ஆட்டம் கண்டது வளர்ச்சிப்பணி : ஓட்டமெடுத்தனர் ஒப்பந்ததாரர்கள் : அதிகாரிகள் கோஷ்டி கானம்

பெரியநாயக்கன்பாளையம் ஒன் றியத்தில் 14 பணிகளுக்கு டெண்டர்
கோரப்பட்டதில் மூன்று பணிகளுக்கு மட்டுமே விண்ணப்பிக்கப்பட்டுள்ளது; மற்ற
பணிகளை ஒப்பந்ததாரர்கள் புறக்கணித்துவிட்டனர். இதற்கு காரணம், ஒன்றிய
அதிகாரிகள் மத்தியில் நிலவும் கோஷ்டி பூசல் என்ற குற்றச்சாட்டு
எழுந்துள்ளது.
பெரியநாயக்கன்பாளையம் ஒன்றியத்தில் வளர்ச்சிப் பணிகளை மேற்கொள்ள 12
பதிவு பெற்ற ஒப்பந்ததாரர்கள் உள்ளனர். ஒன்றிய பொதுநிதி, நமக்கு நாமே
திட்டம் உள்ளிட்ட பல்வேறு திட்டங்களின் கீழ் ஒதுக்கப்படும் நிதியை கொண்டு
வடிகால் கட்டுதல், கான்கிரீட் தளம் அமைத்தல், சிறுபாலம் கட்டுதல், மெட்டல்
சாலை, பொதுகழிப்பிட பராமரிப்பு உள்ளிட்ட பணிகள் மேற்கொள்ளப்படுகின்றன.
கடந்த ஓராண்டாக பெரியநாயக்கன்பாளையம் ஒன்றியத்தில் நடைபெற வேண்டிய 70
லட்சம் ரூபாய் மதிப்பிலான பல்வேறு வளர்ச்சிப் பணிகள் முடங்கியுள்ளன. ஒன்றிய
இன்ஜினியரிங் பிரிவு அதிகாரிகளிடையே நிலவும் கோஷ்டி பூசலே இதற்கு காரணமென
கூறப்படுகிறது. இதுகுறித்து ஒன்றிய கவுன்சிலர்கள் பலரும், தங்களுடைய
அதிருப்தியை இதற்கு முன் நடந்த மன்றக் கூட்டங்களில் வெளிப்படையாக
தெரிவித்தனர். இதற்கு பதிலளிக்கும் வகையில் அனைத்து அதிகாரிகளும்
மன்றக்கூட்டத்தின் போது தவறாது கலந்து கொள்ள வேண்டுமென அறிவுறுத்தப்பட்டது.

அவ்வாறிருந்தும், பி.டி.ஒ., - ஏ.பி.டி.ஒ. உள்ளிட்ட சில அதிகாரிகளை தவிர,
மற்ற அதிகாரிகள் யாரும் கூட்டங்களில் கலந்து கொள்வதில்லை. சமீபத்தில்,
கணுவாயில் நடந்த விழா ஒன்றில் பேசிய தொண்டாமுத்தூர் தொகுதி எம்.எல்.ஏ.,
கந்தசாமி, பெரியநாயக்கன்பாளையம் ஒன்றிய இன்ஜினியரிங் பிரிவு அதிகாரிகளின்
மெத்தனப் போக்கு குறித்து குற்றம்சாட்டினார். அரசின் திட்டங்கள் மக்களை
சென்றடையாதபடி அதிகாரிகள் தடையாக இருப்பதாகவும் அதிருப்தியை வெளியிட்டார்.
இந்நிலையில், பெரியநாயக்கன்பாளையம் ஒன்றிய பொதுநிதியிலிருந்து
ஊராட்சிகளில் சிறுபாலம், வடிகால் கட்டுதல், கான்கிரீட் தளம் அமைத்தல்
உள்ளிட்ட 14.32 லட்சம் மதிப்பில் 14 பணிகளை மேற்கொள்வதற்கான டெண்டர்
சமீபத்தில் கோரப்பட்டது. பிளிச்சி ரங்கராஜபுரத்தில் மண் நிரப்புதல்,
குருடம்பாளையம் லட்சுமி நகரில் மெட்டல் சாலை அமைத்தல், அசோகபுரத்தில்
கான்கிரீட் தளம் அமைத்தல் பணிகளுக்கு மட்டுமே ஒப்பந்ததாரர்கள் ஒப்பந்த
புள்ளிகளை அளித்தனர். மீதமுள்ள சின்னத்தடாகம், நஞ்சுண்டாபுரம், வீரபாண்டி,
பன்னிமடை ஊராட்சிகளில் உள்ள 11 பணிகளை மேற்கொள்ள ஒப்பந்ததாரர் யாரும்
முன்வரவில்லை.
இதுகுறித்து, ஒப்பந்ததாரர்கள் கூறியதாவது: பெரியநாயக்கன்பாளையம்
ஒன்றியத்தின் இன்ஜினியரிங் பிரிவில் உள்ள ஒன்றிய பொறியாளர் மற்றும்
தற்காலிக ஊழியர்கள் ஒரு கோஷ்டியாகவும், மேற்பார்வை பொறியாளர்கள் ஒரு
கோஷ்டியாகவும் அரசியல் கட்சியினரைப் போல செயல்படுகின்றனர். பணி நடக்கும்
இடத்தில் ஆய்வு மேற்கொள்வதில்லை. இதனால் செய்து முடிக்கப்பட்ட பணிகளுக்கான
தொகை உடனடியாக ஒப்பந்ததாரர்களுக்கு கிடைப்பதில்லை. இதுவரை மேற்கொள்ளப்பட்ட
வளர்ச்சிப் பணிகளுக்கான சுமார் ஒரு கோடி ரூபாய் பத்துக்கும் மேற்பட்ட
ஒப்பந்ததாரர்களுக்கு வழங்கப்படாமல் இழுத்தடிக்கப்பட்டு வருகிறது.
இதன்காரணமாகவே, புதிய பணிகளை மேற்கொள்ள எந்த ஒப்பந்ததாரரும் முன்வரவில்லை.
இது குறித்து மாவட்ட அதிகாரிகளிடம் பல முறை முறையிட்டும் பலன் இல்லாமல்
போய்விட்டது.இவ்வாறு, ஒப்பந்ததாரர்கள் தெரிவித்தனர்.
பெரியநாயக்கன்பாளையம் பி.டி.ஒ., ஜானகி கூறுகையில், ""எமது ஒன்றியத்தில்
அனைத்து அதிகாரிகளும் நல்ல முறையில் பணியாற்றி வருகின்றனர். மேற்கொண்டு
கூறுவதற்கு ஒன்றுமில்லை,'' என்றார்.