சுற்றுலா தலங்களை இணைக்க சிறப்பு பஸ்கள் அவசியம்! தனியாருக்கும் வாய்ப்பளித்தால் வருவாய்

ராமநாதபுரம் : மாவட்டத்தில் சுற்றுலா தலங்களை இணைக்கும் சிறப்பு பஸ்களை
இயக்க வேண்டிய கட்டாயம் ஏற்பட்டுள்ள நிலையில், அதற்கான வாய்ப்பினை
தனியாருக்கு வழங்கலாம்.

மாவட்டத்தில் ராமேஸ்வரம், தேவிபட்டினம், ஏர்வாடி தர்கா,
திருப்புல்லாணி, உத்திரகோசமங்கை, நயினார்கோவில் என ஏராளமான ஆன்மீக தலங்கள்
உள்ளன. சுற்றுலா தலமாகவும் இவை இருப்பதால் இங்கு வரக்கூடிய பயணிகளின்
எண்ணிக்கைக்கு பஞ்சமில்லை. இதை அதிகரிக்க வேண்டிய அவசியம் இருந்தும், போதிய
பஸ் வசதியில்லாததால் பயணிகள் சிரமப்படுகின்றனர்.

வாடகை வாகனங்களை பயன்படுத்தினால் மட்டுமே இத்தனை தலங்களை ஒரே
நாளில் பார்க்க முடியும் என்ற நிலை இருந்து வருகிறது. இது பணம்
படைத்தவர்களுக்கு மட்டுமே சாத்தியம் என்பதால், நடுத்தர, ஏழை மக்களுக்கு
இந்த பயணம் உகந்ததாக இல்லை. இத்தலங்களை இணைத்து அரசு தரப்பில் சிறப்பு பஸ்
இயக்க வேண்டும் என்ற கோரிக்கை பல ஆண்டுகளாக இருந்து வருகிறது.

இருந்தும் இன்று வரை அதற்கான ஏற்பாடுகள் நடந்ததாக தெரியவில்லை.
மத வேறுபாடின்றி ஒற்றுமையை பரைசாட்டும் விதமாக அமைந்துள்ள இம்மாவட்டத்தின்
ஆன்மீக சுற்றுலா தலங்களுக்கு சிறப்பு பஸ் இயக்குவதால், அரசுக்கு நிச்சயம்
வருவாய் இழப்பு ஏற்பட போவதில்லை. மதுரை உள்ளிட்ட தென்மாவட்ட மக்களின்
எதிர்ப்பார்ப்பில் உள்ள திட்டம் என்பதால் இதற்கு வரவேற்பு பிரமாதமாக
இருக்கும்.

அரசு பஸ்களை தான் இயக்க வேண்டும் என்பதில்லை. இத்திட்டத்திக்கு
முன்வரும் தனியாருக்கும் இதற்கான அனுமதியை அரசு தயக்கமின்றி வழங்கலாம்.
பின்தங்கிய இம்மாவட்டத்தின் வளர்ச்சிக்கு நிச்சயம் இத்திட்டம் வருவாயை
மட்டுமின்றி, வருகையையும் அதிகரிக்கும் என்பதில் ஐயமில்லை.
சுற்றுலாத்துறையினர் தொடர்ந்து உறக்கத்திலிருந்து வரும் நிலையில், இந்த
விசயத்தில் விழிப்பார்களா என்பது சந்தேகமாக உள்ளது. மாவட்ட நிர்வாகம்
முன்வந்து, இத்திட்டத்தை செயல்படுத்த வேண்டும்.