ஆக்கிரமிப்பு பெயரில் 700 மரங்கள் வெட்டிச் சாய்ப்பு: வருவாய்த் துறை செய்தது சரியா?

அறந்தாங்கி :
அறந்தாங்கி அருகேயுள்ள பூவற்றக்குடியில் ஆக்கிரமிப்புகளை இடிக்கும்
பணியின்போது ஒரே நாளில் 700-க்கும் மேற்பட்ட மரங்களை வருவாய்த் துறையினர்
வெட்டி வீழ்த்தியது சர்ச்சையை உருவாக்கியுள்ளது. அறந்தாங்கி
அருகேயுள்ள பூவற்றகுடியில் அரசுக்குச் சொந்தமான 71 ஏக்கர் நிலத்தை 16 பேர்
ஆக்கிரமித்திருந்தனர். இது தொடர்பான வழக்கில் தீர்ப்பளித்த உயர் நீதிமன்றம்
ஆக்கிரமிப்புகளை இடித்து, சம்பந்தப்பட்ட நிலத்தை மீட்க 2009-ல் அரசுக்கு
உத்தரவிட்டது.ஆனால், அதன் பின்னர் ஆக்கிரமிப்புகளை அகற்றும் பணியில்
இறங்கியபோதெல்லாம் கடும் எதிர்ப்பை வருவாய்த் துறையினர் சந்திக்க
வேண்டியிருந்தது. இதனால், நிலத்தை மீட்கும் முயற்சி தள்ளிக்கொண்டே சென்றது.இந்
நிலையில், நீதிமன்ற உத்தரவை நிறைவேற்றாத காரணத்தால், நீதிமன்ற அவமதிப்பு
குற்றச்சாட்டை புதுக்கோட்டை மாவட்ட நிர்வாகம் எதிர்கொள்ள நேர்ந்தது. இதைத்
தொடர்ந்து கடந்த வாரம் ஆக்கிரமிப்புகளை அகற்ற மாவட்ட நிர்வாகம்
உத்தரவிட்டது.இதன்படி, வருவாய்த் துறையினர் சம்பந்தப்பட்ட நிலத்தை
ஆக்கிரமிப்பாளர்களிடமிருந்து மீட்டனர். இந்த விஷயத்தில் பல
குறுக்கீடுகளுக்கு இடையே துணிச்சலாகச் செயல்பட்ட வட்டாட்சியர் சி.
ராஜேந்திரனை அனைத்துத் தரப்பினருமே பாராட்டினர்.எழுந்தது சிக்கல்:
ஆக்கிரமிப்பாளர்களிடமிருந்து மீட்கப்பட்ட நிலத்தின் பெரும் பகுதியில்,
தென்னை, தேக்கு, கரும்பு, எள், கடலை ஆகியவை சாகுபடி செய்யப்பட்டிருந்தன.
ஏறத்தாழ 700-க்கும் மேற்பட்ட மரங்கள் இந் நிலத்தில் இருந்தன. இவற்றில்
பெரும்பாலானவை தேக்கு மற்றும் தென்னை மரங்களாகும்.கடந்த புதன்கிழமை
நன்கு காய்த்துக்கொண்டிருந்த 489 தென்னை மரங்கள், காய்க்காத தென்னை மரங்கள்
146, 8.5 ஏக்கரில் பயிரிடப்பட்டிருந்த கரும்பு, தலா ஒரு ஏக்கரில்
பயிரிட்டிருந்த கடலை, எள், தேக்கு மரங்கள் என ஏறத்தாழ 47 ஏக்கரில் இருந்த
மரங்கள் மற்றும் பயிர்கள் ஜே.சி.பி. இயந்திரங்களின் துணையோடு வருவாய்த்
துறையினரால் அடியோடு பெயர்ந்தழிக்கப்பட்டன.வருவாய்த் துறையினரின்
இந் நடவடிக்கை விவசாயிகள் மத்தியிலும் சுற்றுச்சூழல் ஆர்வலர்கள்
மத்தியிலும் கடும் அதிர்ச்சியை ஏற்படுத்தியுள்ளது. அரசு நிலத்தை
ஆக்கிரமித்திருப்போர் செயற்கையான கட்டுமானங்களை ஏற்படுத்தியிருந்தால்,
அவற்றை ஆக்கிரமிப்புகள் என அகற்றுவதில் தவறில்லை. ஆனால், இயற்கையான மரங்கள்
- உயிரோடு நிற்பவை - அவற்றை ஆக்கிரமிப்புகள் என்று கூறி அழிப்பது எப்படி
நியாயம் என்ற கேள்வி இப்போது அனைவர் மத்தியிலும் எழுந்துள்ளது.இதுகுறித்து மாநில மரம் வளர்ப்போர் சங்க ஆலோசகர் "மரம்' தங்கசாமி கூறியது: நல்ல நிலையிலிருந்த 700 மரங்களை ஒரே நாளில் அரசு அலுவலர்கள் வெட்டி அழித்திருப்பது அநீதியானது.பூவற்றகுடியில்
நிலம் கையகப்படுத்தியதில் எவர் ஒருவருக்கும் மாற்றுக் கருத்தில்லை;
வரவேற்கிறோம். ஆனால், மரங்களை அடியோடு அழித்ததை எந்த நியாயம் சொன்னாலும்
ஏற்றுக்கொள்ள முடியாது'' என்றார் அவர்.இதுகுறித்து அறந்தாங்கி வட்டாட்சியர் சி. இராஜேந்திரன் கூறியது:""நீதிமன்ற
தீர்ப்பின் அடிப்படையிலேயே ஆக்கிரமிப்புகள் அகற்றப்பட்டன. மரங்களின் மேல்
பலன்கள் மற்றும் வெட்டப்பட்ட மரங்கள் பொது ஏலமிடப்பட்டு, வரக்கூடிய தொகையை
அரசுக் கணக்கில் சேர்க்க நடவடிக்கை எடுக்கப்பட்டுள்ளது.மரங்களை
அகற்றாமல் விட்டிருக்கலாம். ஆனால், நாங்கள் அப்படி விட்டிருந்தால், அதைப்
பற்றி நீதிமன்றம் என்ன முடிவு எடுக்கும் என்று தெரியவில்லை. ஆகவே, மாவட்ட
நிர்வாகத்தைக் கலந்தாலோசித்த பிறகே நாங்கள் மரங்களை வெட்டி அகற்றும்
நடவடிக்கையில் இறங்கினோம்'' என்றார் அவர்.சட்டப்படி மரங்களும்
ஆக்கிரமிப்புகளா என்ற வரையறை தொடர்பாக சட்ட வல்லுநர்கள் பல்வேறு
கருத்துகளைத் தெரிவிக்கிறார்கள். ஒருவேளை சட்டப்படி இதுவரை மரங்கள்
ஆக்கிரமிப்புகளாகக் கருதப்பட்டாலும்கூட இனிவரும் காலங்களில் அந்நிலை மாற
வேண்டும் என்பதே அனைவரின் எதிர்பார்ப்புமாக இருக்கிறது.

எல்லாம் நம்ம ஆளும் முதல்வர் முத்துவேல் கருணாநிதி அரசியல் தீராத விளையாட்டு ................................