மலேசியா: மனித உரிமைகள் கட்சியை உதயகுமார் தொடக்கி வைத்தார்

* இந்தியர்களின் உரிமைகளை மீண்டும் நிலைநாட்டுதல்
* மற்ற இனத்தவரும் புறக்கணிக்கப்படமாட்டார்கள்

மனித உரிமைகள் கட்சி ((HRP) என்றழைக்கப்படும் ஒரு புதிய பல்லினக் கட்சியொன்று அமைக்கப்படுவதாக இண்ட்ராப் தலைவர் பி உதயகுமார் இன்று அறிவித்துள்ளார்.“நமது உரிமைகளுக்காக நாமே போராடுவோம்…. மற்றவர்களை நம்பியிருக்க முடியாது… என்று கூறிய அவர், தேமுவைப் போன்று பக்காத்தான் ராயாட்டும், ஓரங்கட்டப்பட்ட மக்களின் தேவைகளை கவனிக்கவில்லை”, என்றார்.

“ஆனால் இண்டாராப்பின் மக்கள் சக்தி அலையுடன் முன்நோக்கிச் செல்வதற்கு இப்போது காலம் கனிந்துள்ளது. கிள்ளானில் கூடிய சுமார் 2,000 ஆதரவாளர்களிடையே அந்த இடைக்கால தலைமைச் செயலாளர் இதனைத் தெரிவித்தார்.

இண்ட்ராப்பின் 18 அம்சக் கோரிக்கைகளுக்காக எச்ஆர்பி தொடர்ந்து போராடும்.

“சுமார் ஒன்பது மாநிலங்களில் 20விழுக்காடு முதல் 46.2 விழுக்காடு வரையிலான இந்திய வாக்காளர்களுடன், 18 நாடாளுமன்ற மற்றும் 38 சட்டமன்ற இடங்களை நான் அடையாளம் கண்டுள்ளேன்”, என்று உதயகுமார் கூறினார்.

இருப்பினும் இண்ட்ராப், அரசியலைச் சாராது இருப்பதுடன், தற்போது லண்டனில் நாடு கடந்து வாழும் தமது சகோதரர் வேதமூர்த்தியால் வழி நடத்தப்படுமெனவும் அவர் உறுதிப்படுத்தினார்.

தடுப்புக் காவலின்போது எழுதிய புத்தகத்தை வெளியீடு செய்தார்

புதிய கட்சியை அறிவித்த ஒரு வழக்குரைஞரான உதயகுமார், “Malaysian Indian Political Empowerment Strategy: The Way Forward” என்ற தலைப்பிலான தமது புத்தகமொன்றையும் வெளியிட்டார்.

உள்நாட்டுப் பாதுகாப்புச் சட்டத்தின் கீழ் தடுப்புக் காவலில் வைக்கப்பட்ட 514 நாட்களில் அந்த புத்தகத்தை எழுதுவது குறித்த சிந்தனை தோன்றியதாக அவர் குறிப்பிட்டார்.

கோலாலம்பூர் தெருக்களில் நடத்திய மாபெரும் ஆட்சேபப் பேரணியைத் தொடர்ந்து 2007ஆம் ஆண்டு இசாவின் கீழ் உதயகுமாரும் மேலும் நான்கு இண்ட்ராப் தலைவர்களும் காவலில் வைக்கப்பட்டனர்.

தொடர்ந்து தமது ஆதரவாளர்களிடையே பேசிய உதயகுமார், “நான் ஒரு அரசியல்வாதியாக விரும்பவில்லை… ஓர் அரசியல் ஆர்வலராக அழைக்கப்படவே விரும்புகிறேன்”, என்றார்.

இந்திய சமூகத்தினரின் நிலையை உயர்த்துவதில், கட்சிப் போராட்டம் கவனம் செலுத்தும் என்றாலும், பிற சமூகங்களின் நலன்கள் புறக்கணிக்கப்படமாட்டாது என அவர் வலியுறுத்தினார்.

ஜூன் 18ஆம் திகதி, சங்கங்கள் பதிவதிகாரியிடம் விண்ணப்பம் சமர்ப்பிக்கப்பட்டபோதிலும், எச்ஆர்பி கட்சிக்கு இன்னும் அனுமதி கிடைக்கவில்லை.

மக்கள் சக்தி கட்சியுடன் ஒப்பிடுகையில் இது ஒரு பெரிய முரண்பாடு. அந்த கட்சி இரண்டே வாரங்களில் பதிவு செய்யப்பட்டது என்றாரவர்.