சீமான் பேசியதில் தவறில்லை: தமிழர்கள் பற்றி பேசினால் பாதுகாப்பு சட்டத்தை காட்டி மிரட்டுவதா? வைகோ கண்டனம்

ம.தி.மு.க. பொதுச்செயலாளர் வைகோ கோவையில் இன்று நிருபர்களுக்கு பேட்டி அளித்தார். அப்போது அவர் கூறியதாவது:-

கோவை தான் தமிழக அரசியலின் திருப்புமுனை தலமாக அமைந்துள்ளது. ஆளுங்கட்சியினரின் வீழ்ச்சி கோவை மாவட்டத்தில் ஆரம்பித்து விட்டது. அ.தி.மு.க. மீது மக்கள் கொண்டுள்ள பாசமும், விசுவாசமும், நம்பிக்கையும் அ.தி.மு.க. பொதுச் செயலாளர் ஜெயலலிதா பங்கேற்ற கண்டன பொதுக்கூட்டத்தில் தெரிந்தது. அலைகடலென திரண்ட மக்கள் வெள்ளத்தில் எழுச்சியுடன் போர் பரணி கோவையில் தொடங்கி உள்ளது.

69 சதவீத இட ஒதுக்கீடு நிறைவேற காரணமாக இருந்தவர், அடிகோலியவர் வெற்றிக்கு வித்திட்டவர் முன்னாள் முதல்-அமைச்சர் ஜெயலலிதா. ஆனால் கருணாநிதி அனைத்து கட்சி தலைவர்களுக்கு தான் கடிதம் எழுதியதாகவும் அதனால் தான் கிடைத்தது என கூறி வருகிறார். உதாரணம் 1993லே தமிழக முதல்-அமைச்சராக ஜெயலலிதா இருந்த போது 69 சதவீத இடஒதுக்கீடு தீர்மானத்தை சட்டசபையில் நிறைவேற்றினார்.

பாம்பாற்றின் குறுக்கே கேரள அரசு அணை கட்ட எதிர்ப்பு தெரிவித்து ம.தி.மு.க. போராடிய போது கருணாநிதி எந்த ஆதரவும் தெரிவிக்கவில்லை. வாய் மூடி மவுனியாக இருந்தார். ஆனால் சந்திரபாபு நாயுடு கைது செய்யப்பட்ட போது அம்மாநில முதல்-அமைச்சர் ரோசையா, சந்திரபாபு நாயுடுவை விடுதலை செய்ய வேண்டும் என அறிக்கை விட்டுள்ளார். மத்திய அரசு தமிழர்களுக்கு துரோகம் செய்கிறது.

தமிழர்களின் பாதுகாப்பு பற்றி ஏதாவது பேசினால் பாதுகாப்பு சட்டம் என மிரட்டுகிறது. சீமான் பேசியதில் தவறு இல்லை. அவரை விடுதலை செய்ய வேண்டும். கடந்த காலத்தில் கூட சிலர் எரிமலை வெடிக்கும் பூகம்பம் நிகழும் என மேடையில் பேசி உள்ளனர்.

ஐ.நா. அனுப்பி உள்ள குழுவுக்கு இலங்கையை சேர்ந்த எம்.பி.க்கள் கடுமையான கண்டனம் தெரிவித்துள்ளார். போராட்டத்தில் ஈடுபடுகிறார்கள். உச்சகட்டமாக ஐ.நா. பொது செயலாளரை விபசார புரோக்கர் என்று இலங்கை எம்.பி. விமர்சித்துள்ளார். இதற்கு பல்வேறு நாடுகள் கண்டனம் தெரிவித்துள்ளது. ஆனால் இந்தியா எந்தவித கண்டனமும் தெரிவிக்க வில்லை.

இவ்வாறு வைகோ கூறினார்.