இறுதி கட்ட பணியில் 3 ஆயிரம் ஊழியர்கள்: புதிய சட்டசபை அலுவலகங்கள் அக்டோபர் முதல் செயல்படும் ஏற்பாடுகள் தீவிரம்

சென்னை அரசினர் தோட்டத்தில் ரூ.500 கோடி செலவில் கட்டப்பட்டுள்ள புதிய சட்டசபை கட்டிடத்தை பிரதமர் மன்மோகன்சிங் கடந்த மார்ச் மாதம் 13-ந்தேதி திறந்து வைத்தார். முதல்-அமைச்சர் கருணாநிதி தலைமையில் நடந்த இந்த விழாவில், காங்கிரஸ் தலைவர் சோனியாகாந்தி உள்பட பலர் கலந்து கொண்டனர். அதை தொடர்ந்து தமிழக சட்டசபையின் பட்ஜெட் கூட்டத்தொடர் இந்த கட்டிடத்தில் நடந்தது.

முதல்-அமைச்சர் அலுவலகம், அமைச்சர்கள் அலுவலகங்கள் உள்பட பல்வேறு முக்கிய அரசு அலுவலகங்கள் புதிய சட்டசபை கட்டிடத்தில் அமைய உள்ளன. என்றாலும், இதற்கான பணிகள் இன்னும் முடிவடையவில்லை. எனவே இந்த அலுவலகங்கள் புனித ஜார்ஜ் கோட்டையிலேயே தொடர்ந்து செயல்பட்டு வருகின்றன.

புதிய சட்டசபை கட்டிடத்தில் முக்கிய அரசு அலுவலங்கள் அமைப்பதற்கான இறுதி கட்டப்பணிகள் வேகமாக நடந்து வருகின்றன. 3 ஆயிரம் பணியாளர்கள் இரவு பகலாக இந்த பணியில் ஈடுபட்டு வருகிறார்கள். மேல் கோபுரம் அமைக்கும் பணியும் நடக்கிறது.

புதிய சட்டசபை கட்டிடத்தின் பணிகள் அனைத்தும் ஆகஸ்டு மாத இறுதிக்குள் முடிவடையும் என்று எதிர் பார்க்கப்படுகிறது. அதை தொடர்ந்து அலுவலகங்களை கோட்டையில் இருந்து புதிய சட்டசபை கட்டிடத்துக்கு மாற்றும் பணிகள் நடக்கும்.

செப்டம்பர் மாதத்துக்குள் புதிய சட்டசபையில் உள்ள அலுவலகங்கள் அனைத்தும் முழுமையாக அமைக்கப்பட்டு விடும். எனவே, அக்டோபர் முதல் இங்குள்ள அரசு அலுவலகங்கள் அனைத்தும் முழுமையாக செயல்பட தொடங்கி விடும் என்று அரசு வட்டாரங்கள் தெரிவிக்கின்றன.

புதிய சட்டசபையில் அமைய உள்ள மேல்சபை கூடம் அமைக்கும் பணியும் வேகமாக நடந்து வருகிறது. இந்த பணிகள் அனைத்தையும் முதல்-அமைச்சர் கருணாநிதி நேரில் பார்வையிட்டு ஆலோசனை வழங்கி வருகிறார்.