ஆப்கானிஸ்தானில் இருந்து அமெரிக்க ராணுவ வீரர்கள் 2014-ம் ஆண்டு வெளியேற்றம்

ரபீக் · ரபீக் Wed 21 Jul 2010 - 17:13

தலிபான் தீவிரவாதிகளின் ஆட்சியின் கீழ் ஆப்கானிஸ்தான் இருந்தது. எனவே அவர்களை விரட்டியடிக்க கடந்த 2001-ம் ஆண்டு அமெரிக்கா தலைமையிலான பன்னாட்டு படைகள் அங்கு முகாமிட்டன. இதில், இங்கிலாந்து, பிரான்ஸ், உள்ளிட்ட நாட்டு ராணுவ வீரர்கள் உள்ளனர்.

மொத்தம் 1 லட்சத்து 50 ஆயிரம் ராணுவ வீரர்கள் அங்கு தங்கி உள்ளனர். அவர்கள் தலிபான் மற்றும் அல்கொய்தா தீவிரவாதிகளை அடக்கும் பணியில் ஈடுபட்டுள்ளனர். அவர்களுடன் தொடர்ந்து போரிட்டு வருகின்றனர்.

கடந்த 10 ஆண்டுகளாக தீவிரவாதிகளுக்கும், பன்னாட்டு படை வீரர்களுக்கும் இடையே கடுமையான போர் நடந்து வருகிறது. இதில் ஆயிரக்கணக்கான ராணுவ வீரர்களும் பலியாகி வருகின்றனர்.

ஆப்கானில், தலிபான் தீவிரவாதிகளால் நாசப் படுத்தப்பட்டுள்ள ரோடுகள், ஆஸ்பத்திரிகள், கட்டிடங்கள் போன்றவற்றை சீரமைக்கும் பணியில் அமெரிக்கா, இங்கிலாந்து, இந்தியா, உள்ளிட்ட 70 நாடுகளும், சமூகசேவை அமைப்புகளும் ஈடுபட்டுள்ளன. அவர்கள் ஆப்கானிஸ்தான் சீரமைப்புக்காக பல ஆயிரம் கோடி ரூபாயை வழங்கி வருகின்றனர்.

பன்னாட்டு படைகள் முகாமிட்டு 10 ஆண்டுகள் ஆன நிலையில் ஆப்கானிஸ்தான் சீரமைப்புக்கு உதவும் நாட்டு தலைவர்கள் மாநாடு காபூலில் நேற்று நடந்தது.

இதில், அமெரிக்க வெளியுறவு மந்திரி ஹிலாரி கிளிண்டன், இந்திய வெளியுறவு மந்திரி எஸ்.எம்.கிருஷ்ணா, இங்கிலாந்து பிரதமர் டேவிட் கேமரூன், ஐ.நா. பொதுச் செயலாளர் பான்கிமூன் உள்ளிட்டோர் கலந்து கொண்டனர்.

அப்போது 2014-ம் ஆண்டில் அமெரிக்கா தலைமையிலான பன்னாட்டு படைகள் ஆப்கானிஸ்தானில் இருந்து வெளியேறுவது என முடிவு செய்யப்பட்டது. அதற்குள் ஆப்கானிஸ்தான் அரசு தனது நிர்வாகத்தை சீரமைத்து கொள்ள வேண்டும் என்று வலியுறுத்தப்பட்டது.

இதை அதிபர் கர்வாஸ் ஏற்றுக் கொண்டார். 2014-ம் ஆண்டு முதல் நாட்டின் பாதுகாப்பை தங்களது ராணுவத்திடம் ஒப்படைக்க இருப்பதாக உறுதி அளித்தார்.