சினிமாவுலயும் சிக்சர் அடிப்பான் கிரிக்கெட் ஸ்ரீகாந்த் நம்பிக்கை

கிரிக்கெட் வீரர் சடகோபன் ரமேஷ் ஹீரோவாக நடிக்கும் படம் பட்டாப்பட்டி. கிரவுண்ட்ல அடிக்கிற சிக்சரை சினிமாவிலும் அடிக்கணும்னு ஆசைப்பட்டார் போலிருக்கிறது. சந்தோஷ் சுப்ரமணியபுரம் படத்தில் அறிமுகமாகி பல மாதங்கள் ஆன பிறகும் நல்ல கதைக்காக காத்திருந்தாராம். அவர் நினைத்தது மாதிரியே அமைந்தது பட்டாப்பட்டி. இந்தியில் லகான் வெளியாகி எப்படியொரு அதிரடி ஹிட்டை கொடுத்ததோ, அப்படி ஒரு ஹிட்டை இந்த படம் கொடுக்கும் நம்பிக் கொண்டிருக்கிறது பட்டாப்பட்டி டீம்! காரணம், இந்த படமும் கிட்டதட்ட அதே கதைதான்.

இப்படத்தின் ட்ரெய்லர் வெளியீட்டு விழாவுக்கு வந்திருந்தார் அதிரடி ஆட்டக்காரர் ஸ்ரீகாந்த். ஆடியோ ரிலீசுக்கு அழைத்திருந்தார்கள். இப்போதுதான் நேரம் கிடைத்து ட்ரெய்லர் ரிலீசுக்கு வந்திருந்தார். பேட் மட்டுமல்ல, ஸ்ரீகாந்தின் வாயும் சிக்சர் அடிக்கும் போலிருக்கிறது. இல்லையென்றால் அசால்ட்டாக கிண்டல் அடித்துவிட்டு போக முடியுமா என்ன? எல்லா மேடையிலும் ஒரு போர்வையை போர்த்தி ஒரு பொக்கேவை கொடுக்கறதை நிறுத்துங்கப்பா. ரொம்ப போரடிக்குது. புதுசா ஏதாவது ட்ரை பண்ணுங்க என்றார். (வாஸ்த்தவம்தான்)

கிரவுண்ட்ல சிக்சர் அடிச்சுட்டு இருந்தான். சினிமாவுலயும் அடிப்பான்னு நம்புறேன். அவனோட விளையாட்டை கிரவுண்ட்ல மட்டும் வச்சுக்கணும். இந்த பீல்டுல வச்சுக்க கூடாதுன்னு சடகோபன் ரமேஷ§க்கு கலகலப்பாக அட்வைஸ் பண்ணிவிட்டு கிளம்பினார் ஸ்ரீகாந்த். நான் கிரிக்கெட் ஆடிகிட்டு இருந்தேன். திடீர்னு மழை வந்திருச்சு. இல்லேன்னா இந்த விழாவுக்கே வந்திருக்க முடியாது என்றார் சடகோபன் ரமேஷ்.

இப்படி சொல்றாரே, மழை வரலேன்னா நிகழ்ச்சிக்கு வராம கூட இருந்திருப்பாரோ என்று குழம்பினார்கள் நிருபர்கள். நம்புங்க, இவருதான் இந்த படத்தின் ஹீரோ!