பீகார் சட்டசபையில் பெரும் அமளி-சபாநாயகர் மீது செருப்பு வீச்சு-17 பேர் சஸ்பெண்ட்

பீகார் சட்டசபையில் இன்று பெரும் அமளி ஏற்பட்டது. சபாநாயகர் மீது செருப்புகளை வீசி சரமாரியாக நடந்து கொண்டனர் லாலு மற்றும் பாஸ்வான் கட்சி எம்.எல்.ஏக்கள். இதையடுத்து அக்கட்சிகளைச் சேர்ந்த 17 எம்.எல்.ஏக்கள் கூட்டத் தொடர் முழுவதுக்கும் சஸ்பெண்ட் செய்யப்பட்டனர்.

பீகார் சட்டசபையில் நேற்று பெரும்அமளி ஏற்பட்டது. ஐக்கிய ஜனதாதள கட்சிக்கும், லாலு மற்றும் பாஸ்வான் கட்சி எம்.எல்.ஏக்களுக்கும் இடையே கடும் மோதல் மூண்டதால் சட்டசபையில் பெரும் அமளியானது. விலைவாசி உயர்வு, மத்தியஅரசின் தோல்விகள் குறித்து இந்த சண்டை மூண்டது.

இதையடுத்து இன்று சட்டசபையைச் சுற்றிலும் பெருமளவில் போலீஸார் குவிக்கப்பட்டனர்.

மேலும், கடந்த 2002 முதல் 2008 வரை முறைகேடாக சுருட்டப்பட்ட ரூ. 11,000 கோடி குறித்து சிபிஐ விசாரணை நடத்தலாம் என பாட்னா உயர்நீதிமன்றம் பிறப்பித்த உத்தரவை மேற்கோள் காட்டி முதல்வர் நிதீஷ்குமார் பதவி விலகக் கோரி லாலுவின்ராஷ்டிரிய ஜனதாதளத்தினர் அமளியில் இறங்கினர்.

இதனால் நேற்றைய கூட்டம் பெரும் வன்முறையுடன் முடிந்தது. இந்த நிலையில் இன்றுகாலை அவை கூடியதும் பெரும் வன்முறை மூண்டது. பாஸ்வான், லாலு கட்சிகளைச் சேர்ந்தர்கள் சபாநாயகரை நோக்கி செருப்புகளை கழற்றி சரமாரியாக வீசினர். இதில் பல செருப்புகள் சபாநாயகர் மீது வந்து விழுந்ததால் பெரும் பரபரப்பு ஏற்பட்டது.

இந்த சம்பவத்தைத் தொடர்ந்து அவை மார்ஷல்கள் வரவழைக்கப்பட்டு வன்முறையில் ஈடுபட்டவர்கள் குண்டுக்கட்டாக தூக்கி வெளியேற்றப்பட்டனர்.

பின்னர் வன்மு்றையில் ஈடுபட்டு அவையின் மாண்பைக் குலைக்கும் வகையில்நடந்து கொண்ட லாலு, பாஸ்வான் கட்சிகளைச் சேர்ந்த 17 பேரை கூட்டத் தொடர் முழுமைக்கும் சஸ்பெண்ட் செய்வதாக சபாநாயகர் அறிவித்தார்.