சுரங்கத் தொழிலில் முதலீடு இந்தியாவுக்கு ஆப்கன் அழைப்பு

ஆப்கானிஸ்தானில் உள்ள சுரங்கத் தொழிலில் ஈடுபட முன்வருமாறு இந்தியத் தொழிலதிபர்களுக்கு ஆப்கன் அழைப்பு விடுத்துள்ளது. ஆப்கானிஸ்தானுக்கு உதவி செய்யும் நாடுகளின் கூட்டம் தலைநகர் காபூலில் நடைபெறுகிறது. இதில் பங்கேற்பதற்காக மத்திய வெளியுறவு அமைச்சர் எஸ்.எம். கிருஷ்ணா சென்றுள்ளார். திங்கள்கிழமை இரவு அமைச்சரை நேரில் சந்தித்த ஆப்கானிஸ்தானின் கனிமத்துறை அமைச்சர் வாஹிதுல்லா சஹரானி, இந்தியத் தொழிலதிபர்கள் ஆப்கனில் முதலீடு செய்ய வேண்டும் என்று அழைப்பு விடுத்தார்.

ஆப்கனில் மிக அதிக அளவில் கனிம வளம் இருப்பதை அமெரிக்க ஆய்வாளர்கள் சமீபத்தில் கண்டுபிடித்துள்ளனர். இத்தகைய வளத்தை எடுப்பதற்கு இந்திய நிறுவனங்கள் வரவேற்கப்படுகின்றன. சமீபத்தில் பாகிஸ்தானுடன் ஒப்பந்தம் செய்யப்பட்டுள்ளது. இதனால் சுரங்கத் தொழிலில் ஈடுபடும் இந்திய நிறுவனங்கள் ஆப்கனிலிருந்து சாலை வழியாக பாகிஸ்தான் மூலம் இந்தியாவுக்குக் தேவையான கனிமத்தைக் கொண்டு செல்ல முடியும் என அவர் கூறியதாக அமெரிக்காவிலிருந்து வெளியாகும் "நியூயார்க் டைம்ஸ்' செய்தி வெளியிட்டுள்ளது.

ஆப்கனில் தலிபான் அச்சுறுத்தல் நிலவிய போதிலும் சில இந்திய நிறுவனங்கள் வெற்றிகரமாக செயல்படுகின்றன. அதைப் போல சுரங்கத் தொழிலில் ஈடுபடும் இந்திய நிறுவனங்களுக்கு உரிய பாதுகாப்பு அளிக்கப்படும் என்றும் அமைச்சர் உறுதி அளித்ததாகக் குறிப்பிடப்பட்டுள்ளது. தற்போது சுரங்கத் தொழிலில் பன்னாட்டு நிறுவனங்களை ஈடுபடச் செய்வதன் மூலம் பலருக்கு வேலை வாய்ப்புக் கிடைக்கும். இதனால் உள்நாட்டுப் போரினால் சிதிலமடைந்துள்ள ஆப்கனின் பொருளாதாரம் மேம்படும். அடிப்படைக் கட்டமைப்பு உள்ளிட்டவை வளர்ச்சியடையும்போது, தலிபான் பயங்கரவாதிகள் தனிமைப்படுத்தப்படுவர். இதன் மூலம் அவர்களை படிப்படியாக அழித்துவிடலாம் என்ற உத்தியில் ஆப்கன் ஈடுபட்டுள்ளது.

ஆப்கனில் சுரங்கத் தொழிலில் ஈடுபட விரும்புவதாக ஆர்சிலர் மித்தல் நிறுவனம் தெரிவித்துள்ளது. இதற்காக சமீபத்தில் சாலை மூலமான விளம்பர பிரசாரத்தையும் அந்நிறுவனம் மேற்கொண்டதாக சுரங்கத்துறை அமைச்சர் வாஹிதுல்லா, வெளியுறவு அமைச்சர் கிருஷ்ணாவிடம் எடுத்துக் கூறியதாக "டைம்ஸ்' செய்தி வெளியிட்டுள்ளது.

அமெரிக்காவைச் சேர்ந்த மண்ணியல் நிபுணர்கள் சமீபத்தில் ஆப்கனில் ஆய்வு செய்ததில் சுமார் ஒரு லட்சம் கோடி (1 டிரில்லியன்) டாலர் மதிப்புக்கு கனிம வளம் உள்ளதாகத் தெரிவித்துள்ளனர். இதை வெளிக்கொணர்வதன் மூலம் ஆப்கன் பொருளாதார நிலைமை மேம்படும் என்றும் குறிப்பிட்டுள்ளனர். இரும்பு, தாமிரம், கோபால்ட் மற்றும் தங்கம் இருப்பதற்கான வாய்ப்புகள் உள்ளதாகக் கண்டறியப்பட்டுள்ளது. இது தவிர, மிகவும் மதிப்பு மிக்க லித்தியம் தாதுக்களும் இங்கு அதிகம் உள்ளது கண்டறியப்பட்டுள்ளது. லித்தியம் பேட்டரிகள் லேப்டாப் மற்றும் பிளாக் பெர்ரி செல்போனில் பயன்படுகிறது. ஆப்கனில் உள்ள லித்தியம் செரிவை பறைசாற்றும் வகையில் "லித்தியத்தின் சவூதி அரேபியா' என அமெரிக்கா வர்ணித்துள்ளது. அதாவது பெட்ரோலியப் பொருள்கள் சவூதி அரேபியாவில் அதிகம் கிடைப்பதைப் போல ஆப்கனில் லித்தியம் அதிகம் கிடைக்கும் என்பதே இதன் பொருளாகும்.

தற்போதைய சூழலில் அரசே சுரங்கத் துறையை மேம்படுத்தி அதன் மூலம் பொருளாதார வளத்தை அதிகரிக்க இன்னும் பல ஆண்டுகளாகும். மேலும் இதற்கு அதிக முதலீடு தேவைப்படுகிறது. இதைக் கருத்தில் கொண்டு வெளிநாட்டு நிறுவனங்களை இதில் ஈடுபடுத்துவதன் மூலம் விரைவில் வளர்ச்சியை எட்ட முடியும். மேலும் பொருளாதார வளர்ச்சியடையும்போது உள்நாட்டு போரின் தீவிரம் குறையும் என அரசு உறுதியாக நம்புகிறது.

தற்போது ஆப்கனில் போதைப் பொருள் கடத்தல் அதிகமாக உள்ளது. இதிலிருந்து மாற, சுரங்கத் தொழிலைப் பிரதானப்படுத்த அரசு முயற்சித்து வருகிறது.

ஆப்கனின் ஒட்டுமொத்த உள்நாட்டு உற்பத்தி (ஜிடிபி) 1,200 கோடி டாலராகும். ஆப்கனின் தெற்கு மற்றும் கிழக்குப் பகுதியில் கனிம வளம் மிகுதியாக உள்ளது. இதில் பாகிஸ்தானின் எல்லையை ஒட்டிய பகுதியில் அதிகம் இருப்பதாகத் தெரியவந்துள்ளது. இதில் தலிபான் பயங்கரவாதிகளை அழிப்பதற்காக அமெரிக்க ராணுவம் மேற்கொண்ட பகுதிகளும் இதில் அடங்கும் என்று "டைம்ஸ்' செய்தியில் குறிப்பிடப்பட்டுள்ளது.