டீசல் விலை உயர்வை சமாளிக்க புது யுக்தி : பஸ்களில் விளம்பரம்

டீசல் விலையை மத்திய அரசு உயர்த்தியதால், பஸ் பயண கட்டணத்தை அதிகரித்தால் மட்டுமே நஷ்டத்தில் இருந்து மீளமுடியும் என்ற நிலைக்கு தள்ளப்பட்டிருக்கிறது, தமிழ்நாடு அரசு போக்குவரத்துக்கழகம். அவ்வாறு, கட்டணத்தை உயர்த்தினால் எதிர்ப்பை சம்பாதிக்க நேரிடும் என்ற முன்னெச்சரிக்கையுடன், விளம்பரம் மூலமாக வருவாயை கூட்டி, நஷ்டத்தை சமாளிக்க நடவடிக்கை மேற்கொண்டுள்ளது தமிழக அரசு.

பெட்ரோல், டீசல் விலையை மத்திய அரசு அடிக்கடி உயர்த்தி வருகிறது. இதைக்காரணம் காட்டி, தமிழகத்தில் சரக்கு வாகன கட்டணமும் உடனுக்குடன் அதிகரிக்கப்படுகிறது. எனினும், பஸ் கட்டணம் உயர்த்தப்படாமல் கட்டுப்பாட்டில் வைத்திருக்கிறது அரசு. இந்நிலையில், சமீபத்தில் பெட்ரோல், டீசல் விலையை மத்திய அரசு மீண்டும் உயர்த்திவிட்டது. பஸ் கட்டணத்தை உயர்த்தினால் மட்டுமே அரசு போக்குவரத்துக்கழகத்தை வரும் ஆண்டுகளில் நஷ்டமின்றி நடத்த முடியும் என்ற நிர்பந்தம் ஏற்பட்டிருக்கிறது. இருப்பினும், "கட்டணத்தை உயர்த்தினால் கடும் எதிர்ப்பை சம்பாதிக்க நேரிடும்; எதிர்வரும் சட்டசபை தேர்தலில் இப்பிரச்னையை எதிர்கட்சிகள் கையிலெடுத்து தி.மு.க.,வுக்கு எதிராக பிரசாரம் செய்யக்கூடும்' என தமிழக அரசு கருதுகிறது.

எனவே, பஸ் கட்டணத்தையும் உயர்த்தாமல், அரசு போக்குவரத்துக்கழகம் நஷ்டத்திலும் வீழாமல் தாங்கிப்பிடிப்பதற்கான மாற்றுத் திட்டத்தை அமல்படுத்த தயாராகிவிட்டது. தமிழகத்தில், அரசு போக்குவரத்துக் கழக பஸ்கள் ஆயிரக்கணக்கில் இயக் கப்படுகின்றன. இந்த பஸ்களில், குறிப் பிட்ட சில நிற பெயின்ட் மட்டுமே பயன்படுத்தப்படுகின்றன. சில பஸ்களில் பெயின்ட் பூச்சு தவிர்க்கப்பட்டு அலுமினிய நிறமே மின்னுகிறது. எனவே, பஸ்களின் பக்கவாட்டு பகுதிகளில் விளம்பரம் செய்து கொள்ள தனியார் நிறுவனங்களை அனுமதிப்பதற்கான பணிகள் முடுக்கிவிடப்பட்டுள்ளன.

இதற்காக, அரசு போக்குவரத்துக் கழக கோட்ட அலுவலகங்களில், தனியார் நிறுவனங்களிடம் டெண்டர் கோரப்பட்டுள்ளது. தமிழகத்தில் மொத்தம் 15 கோட்டங்கள் உள்ளன. டவுன்பஸ்கள், புறநகர் பஸ்கள், அல்ட்ரா டீலக்ஸ் பஸ்கள், தாழ்தள சொகுசு பஸ்கள் என பலவிதமான பஸ்கள் இயக்கப்படுகின்றன. இவை அனைத்திலும், தனியார் நிறுவனங்களின் விளம்பரங்கள் இனி, பளிச்சிடவுள்ளன. இதற்கு கட்டணம் வசூலிக்கப்படுவதன் மூலமாக, அரசு போக்குவரத்துக்கழகத்துக்கு பெரும் தொகை சேரும் வாய்ப்புள்ளது. எரிபொருள் விலையேற்றத்தையொட்டி, பயணிகளுக்கான பஸ் கட்டணத்தை உயர்த்தாமலே, நிதியிழப்பிலிருந்து போக்குவரத்துக்கழகம் மீளும் வாய்ப்புள்ளது.

தற்போது, தமிழகத்திலுள்ள 15 கோட்டங்களில், ஒவ்வொரு கோட்டத்திலும் குறைந்தபட்சம் 2,000 பஸ்கள் வீதம் இயக்கப்படுகின்றன. பஸ்சின் பின்பக்கத்தில் 4 க்கு 3 அடி என்ற அளவிலும், டிரைவர் சீட்டுக்கு பின்புறம் ஒன்றரைக்கு ஒன்றே முக்கால் அடி என்ற அளவிலும் விளம்பரங்கள் இடம்பெற்றுள்ளன. இதன்மூலமாக, ஆண்டுக்கு 80 லட்சம் ரூபாய், அரசு போக்குவரத்துக்கழகத்துக்கு வருவாயாக கிடைக்கிறது. அரசின் புதிய முடிவின்படி, பஸ்சின் பக்கவாட்டு பகுதி, பின்புற கண்ணாடி மற்றும் பஸ்சின் உட்புறம் பயணிகள் சீட்டுக்கு மேல் கண்ணாடிகளில் விளம்பரம் செய்யப்பட்டால், வருவாய் பல மடங்கு உயரும் என அரசு கணக்கிட்டுள்ளது.

சட்ட விரோதமா?போக்குவரத்துத் துறை உயரதிகாரி ஒருவர் கூறுகையில், "மோட்டார் வாகனச்சட்டப்படி, பஸ்களின் பக்கவாட்டு பகுதிகளிலோ, பின்பகுதியிலோ விளம்பரம் இடம்பெறக்கூடாது. அவ்வாறு இடம்பெற்றால், வாகன ஓட்டிகளின் கவனம் சிதறி, விபத்து நடக்கும் வாய்ப்பு உள்ளது. தனியார் பஸ்கள் சிலவற்றில் கவர்ந்திழுக்கம் படங்களை பக்கவாட்டு பகுதிகளில் வரைந்திருக்கின்றனர். சம்பந்தப்பட்ட பஸ்களுக்கு அபராதம் விதித்து, உரிமையாளர் மீது நடவடிக்கை மேற்கொள்ளப்பட்டுள்ளது' என்றார். தமிழக அரசின் புதிய திட்டம், மோட்டார் வாகனச் சட்டத்துக்கு விரோதமானதா? என்ற கேள்வி எழுந்துள்ளது.

நல்லதொரு முயற்சி,, தொடரட்டும்