குற்றாலம் சாரல் விழா: ஜூலை 24-ல் தொடக்கம்

திருநெல்வேலி, ஜூலை 19: குற்றாலத்தில் சாரல் திருவிழா ஜூலை 24ஆம் தேதி தொடங்கி 31ஆம் தேதி வரை நடைபெற உள்ளது.

8 நாள்கள் நடைபெறும் இந்த விழாவில் நாள்தோறும் கலைநிகழ்ச்சிகள், விளையாட்டுப் போட்டிகள், கண்காட்சிகள், பட்டிமன்றம் போன்ற பல்வேறு நிகழ்ச்சிகளுக்கு ஏற்பாடு செய்யப்பட்டுள்ளது.

சாரல் திருவிழாவின் தொடக்க நிகழ்ச்சி ஜூலை 24ஆம் தேதி மாலை 6 மணிக்கு சட்டப் பேரவைத் தலைவர் இரா. ஆவுடையப்பன் தலைமையில் நடைபெற உள்ளது.

மாநில சுற்றுலா மற்றும் பதிவுத்துறை அமைச்சர் என். சுரேஷ்ராஜன் கலந்துகொண்டு விழாவை தொடக்கிவைப்பார். மாநில இந்து சமய அறநிலையத் துறை அமைச்சர் கே.ஆர். பெரியகருப்பன், கலைநிகழ்ச்சிகளைத் தொடக்கிவைப்பார். மாநில சுற்றுச்சூழல் துறை அமைச்சர் டி.பி.எம். மைதீன்கான், தகவல் தொழில்நுட்பத் துறை அமைச்சர் பூங்கோதை ஆகியோர் சிறப்புரையாற்ற உள்ளனர்.

மக்களவை உறுப்பினர் பி. லிங்கம், சட்டப் பேரவை உறுப்பினர் வீ. கருப்பசாமி பாண்டியன் ஆகியோர் முன்னிலை வகிக்க உள்ளனர். மக்களவை, மாநிலங்களவை உறுப்பினர்கள், சட்டப் பேரவை உறுப்பினர்கள், உள்ளாட்சி அமைப்புகளின் பிரதிநிதிகள் கலந்துகொள்வார்கள்.

தொடக்க நிகழ்ச்சியையொட்டி, மாலை 4 மணிக்கு மாவட்ட அரசு இசைப் பள்ளி மாணவ, மாணவிகளின் இசைச் சங்கமமும், மாலை 5 மணிக்கு சென்னை ஸ்ரீ வடிவுடையம்மன் நாட்டியாலயா எஸ். சுஜதா குழுவினரின் பல்சுவை நாட்டிய நிகழ்ச்சியும், இரவு 7.30 மணிக்கு தொலைக்காட்சி நிகழ்ச்சி இயக்குநர் ராஜ்குமார் வழங்கும் "அசத்தப்போவது யாரு' நிகழ்ச்சியும் நடைபெறும். மாவட்ட ஆட்சியர் மு.ஜெயராமன் வரவேற்புரையாற்றுவார்.

தொடர்ந்து விழா நாள்களில் நாள்தோறும் மாலையில் கலைவாணர் அரங்கில் கலைநிகழ்ச்சிகள் நடைபெறும்.

போட்டிகள்: விழாவையொட்டி ஜூலை 25ஆம் தேதி மாலை 2.30 மணிக்கு ஆணழகன் போட்டியும், 26ஆம் தேதி பிற்பகல் 3 மணிக்கு பழைய குற்றாலம் ஹில்டன் பள்ளி அருகில் ரோலர் ஸ்கேட்டிங் போட்டியும், 27ஆம் தேதி காலை 10.30 மணிக்கு கோலப் போட்டியும், 28ஆம் தேதி காலை 10.30 மணிக்கு இந்திய கலாசார ஆடை, அலங்காரம் மற்றும் ஆரோக்கியமான குழந்தைகள் போட்டியும் நடைபெறும்.

ஜூலை 29 பிற்பகல் 2 மணிக்கு நாய்கள் கண்காட்சியும், 30ஆம் தேதி பிற்பகல் 3 மணிக்கு குற்றாலம் நீச்சல் குளத்தில் நீச்சல் போட்டியும், 31ஆம் தேதி காலை 10.30 மணிக்கு குற்றாலம் படகு குழாமில் படகுப் போட்டியும் நடைபெறும். இந்தப் போட்டிகளில் பொதுமக்கள், பள்ளி, கல்லூரி மாணவ, மாணவிகள் மற்றும் சுற்றுலா பயணிகள் கலந்துகொள்ளலாம். போட்டிகளில் வெற்றி பெறுவோருக்கு அதேநாளில் கலைவாணர் அரங்கில் நடைபெறும் விழாவில் பரிசு வழங்கப்படும்.

போட்டிகள் தொடர்பாக மேலும் விவரங்களை அறிய விரும்புவோரும், போட்டிக்கு தங்களது பெயர்களைப் பதிவுசெய்ய விரும்புவோரும் மேலாளர், ஓட்டல் தமிழ்நாடு, குற்றாலம், தொலைபேசி எண் 04633-283003 என்ற முகவரியிலும், மாவட்ட விளையாட்டு அலுவலர், அண்ணா விளையாட்டு மைதானம், ரிசர்வ்லைன் சாலை, பாளையங்கோட்டை, திருநெல்வேலி, தொலைபேசி 0462-2572632 என்ற முகவரியிலும் தொடர்பு கொள்ளலாம்.