சிறந்த கல்லூரிகளில் இடம்: பி.இ. இடைத் தரகர்களை கண்காணிக்க குழு

சென்னை, ஜூலை 18:
சிறந்த கல்லூரிகளில் பி.இ. இடம் வாங்கித் தருவதாக சுற்றித் திரியும் இடைத்
தரகர்களைக் கண்காணித்து, அவர்கள் மீது நடவடிக்கை எடுக்க தனிக் குழு
அமைக்கப்பட்டுள்ளது என முதல்வர் கருணாநிதி கூறினார்.பொறியியல்
படிப்புகளுக்கான கலந்தாய்வு சென்னை அண்ணா பல்கலைக்கழகத்தில் ஜூன் 28-ம்
தேதி தொடங்கியது. பொதுப் பிரிவினருக்கான கலந்தாய்வு ஜூலை 5-ல் தொடங்கியது.
முதல் கட்ட கலந்தாய்வு ஜூலை 20-ல் முடிவடைகிறது.போலி மதிப்பெண்
சான்றிதழ் விவகாரத்தைத் தொடர்ந்து உயர் கல்வித் துறை அமைச்சரும், உயர்
அதிகாரிகளும் கலந்தாய்வு நடைபெறுவதை அவ்வப்போது பார்வையிட்டு ஆய்வு செய்து
வருகின்றனர்.முதல்வர் கருணாநிதி ஞாயிற்றுக்கிழமை கலந்தாய்வை
பார்வையிட்டார். அப்போது தன்னுடைய சொந்த ஊரான திருவாரூர் மாவட்டம்
திருக்குவளையைச் சேர்ந்த மாணவி டி. ஜீவிதா உள்பட ஆறு மாணவ, மாணவிகளுக்கு
கல்லூரிகளில் சேருவதற்கான உத்தரவை முதல்வர் வழங்கினார். பின்னர்
முதல்வர் கூறியதாவது:பொறியியல் படிப்புகளுக்கான கலந்தாய்வுக்கு
விண்ணப்பித்த ஒரு லட்சத்து 67 ஆயிரத்து 408 பேரில் ஒரு லட்சத்து 63
ஆயிரத்து 11 பேர் தேர்வு செய்யப்பட்டுள்ளனர். இவர்களில் இதுவரை
அழைக்கப்பட்ட 36 ஆயிரத்து 538 பேரில் 34 ஆயிரத்து 597 பேருக்கு பி.இ. இட
ஒதுக்கீடு அளிக்கப்பட்டுள்ளது.முதல் தலைமுறை மாணவர்களைப் பொருத்தவரை
விண்ணப்பித்த 76 ஆயிரம் பேரில் இதுவரை 13 ஆயிரத்து 437 பேருக்கு ஒதுக்கீடு
வழங்கப்பட்டுள்ளது. இவர்களுக்கு அறிவித்ததுபோல் கட்டணம் இல்லாத இலவசக்
கல்வி உள்ளிட்ட பல்வேறு சலுகைகள் வழங்கப்படும்.உலகத் தமிழ் செம்மொழி
மாநாட்டில் அறிவித்ததற்கு இணங்க நடைமுறைப்படுத்தப்பட்டுள்ள தமிழ் வழி
பொறியியல் படிப்பில் இதுவரை 149 பேர் சேர்ந்துள்ளனர். இந்த எண்ணிக்கை
மேலும் கூடும் என்ற நம்பிக்கை உள்ளது.கலந்தாய்வில் போலி மதிப்பெண்
சான்றிதழ் கொடுத்து ஏமாற்ற முயன்றவர்கள் மீது சட்டப்படி நடவடிக்கை
எடுக்கப்படும்.சிறந்த கல்லூரிகளில் இடம் வாங்கித் தருவதாகக் கூறி,
சுற்றித் திரியும் இடைத் தரகர்களைக் கண்காணித்து, அவர்கள் மீது நடவடிக்கை
எடுக்க தனிக் குழு அமைக்கப்பட்டுள்ளது.இதுபோன்று ஏமாற்றுபவர்களை
விட, ஏமாறுபவர்களை நினைக்கும்போதுதான் மிகுந்த வேதனையாக உள்ளது என்றார்
அவர்.