11 ஆண்டுகளாக பிணத்துடன் வாழ்ந்து வரும் அமெரிக்க பெண்

இறப்பு என்பதை பிரிவாக நினைப்பதில்லை. அப்படி நினைத்து உடலை அழிப்பது எனக்கு கடினம்’’ என்று கூறுகிறார் அமெரிக்காவின் 91 வயது பெண். 11 ஆண்டுகளாக கணவர் பிணத்துடனும், ஓராண்டாக அன்பு சகோதரி பிணத்துடனும் வசிக்கிறார் அவர்.
அமெரிக்காவின் பென்சில்வேனியா மாநிலம் வேயலுசிங் என்ற கிராமத்தை சேர்ந்தவர் ஜீன் ஸ்டீவன்ஸ். வயது 91. இவரது அன்பு கணவர் ஜேம்ஸ். இரட்டை பிறவியான ஜீனின் சகோதரி ஜுன் ஸ்டீவன்ஸ். ஜேம்சுடன் வேயலுசிங் கிராமத்தில் வசித்தார் ஜீன். அங்கிருந்து 200 மைல் அப்பால் உள்ள வெஸ்ட் ஹார்ட்போர்டில் அவரது சகோதரி வசித்து வந்தார். இருவரும் தங்களைப் போலவே அதிர்ஷ்டவசமாக சகோதரர்களை திருமணம் செய்திருந்தனர்.

கணவர், சகோதரி மீது ஜீன் ஸ்டீவனுக்கு அப்படியொரு பாசம். ராணுவத்தில் பணியாற்றிய ஜேம்ஸ், 2ம் உலக போருக்கு பிறகு ஜெனரல் எலக்ட்ரிக் நிறுவனத்தில் சேர்ந்தார். 1999ம் ஆண்டு மே 21ம் தேதி உடல்நலக் குறைவால் இறந்தார். அவரது உடலை உறவினர்கள் புதைத்து சென்றதும், ரகசியமாக அதை தோண்டியெடுத்து வீட்டுக்கு தூக்கி வந்தார் ஜீன்.

பிணம் கெடாமல் இருக்க செய்யும் ரசாயனங்களை தெளித்து 11 ஆண்டுகளாக பாதுகாத்து வருகிறார். கணவருக்கு நிகராக பாசம் வைத்திருந்த சகோதரி ஜுனும் கடந்த ஆண்டில் இறந்தார். இறுதி சடங்குக்கு போன ஜீன், வரும் போது வழக்கம்போல யாருக்கும் தெரியாமல் சகோதரியின் பிணத்தை வீட்டுக்கு கொண்டு வந்தார். அதற்கும் ரசாயன திரவங்களை பயன்படுத்தி பாதுகாத்து வருகிறார்.

கடந்த மாதம் இந்த விஷயம் வெளியே தெரிய, போலீஸ் விசாரித்து வருகிறது. விசாரணையில் ஜீன் ஸ்டீவன்ஸ் கூறுகையில், ‘‘கணவரும், சகோதரியும் இறந்திருக்கலாம். அதைப்பற்றி எனக்கு கவலையில்லை. இறப்பை என்னால் ஜீரணிக்க முடியவில்லை. உடலை அழித்து விட்டால் நினைவுகள் அழிந்து விடும். ஆனால், இப்போது பாருங்கள். கணவர், சகோதரியை தினமும் பார்க்கிறேன். அவர்களுடன் பேசுகிறேன். தொட்டு, கொஞ்சி மகிழ்கிறேன்’’ என்கிறார்.

இதுபற்றி போலீஸ் அதிகாரி கூறுகையில், ‘‘ஜீன் நடத்தை பற்றி விசாரிக்கிறோம். பிணங்களை அவரிடம் இருந்து பிரித்து வைத்துள்ளோம். ஆனால், அவர் மீது வழக்கு தொடரவில்லை’’ என்றார்.

" இது சாதரணமான அன்பு அல்ல"

இது அப்பெண்ணின் தனிப்பட்ட விருப்பம்! இதில் வழக்குத் தொடர ஒன்றுமில்லை! இவரால், அல்லது அவர் பாதுகாத்து வரும் பிணத்தால் மற்றவர்களுக்கு எந்தப் பிரச்சனையும் இல்லை! எனவே அவர் விருப்பப்படியே அப்பிணங்களைப் பாதுகாக்க அனுமதி அளிக்க வேண்டும்!

பேய் குடும்பம் இது தானா