இறப்பின் மொழி ஒப்பாரி மட்டுமல்ல... -விழி நீரை துடைத்த விவேக்!

இறப்பின் மொழி ஒப்பாரியாக மட்டுமே இருந்திருக்கிறது. ஆனால் பத்திரிகையாளர் ராதாராஜின் இறப்பு அதையும் மீறி சில விஷயங்களை செய்ததுதான் விந்தை. பல மாதங்களாக நம்மிடமிருந்து விலக்கப்பட்டிருந்த நடிகர் விவேக்கை ஆறுதலாகவும், அன்போடும் பார்க்க வைத்திருக்கிறது இந்த மரணம். அவரது இறப்புக்கு பின் அனாதரவாக நிற்கும் அவரது குடும்பத்திற்கு என்ன செய்வது? இந்த கேள்வியே பெரும் குடைச்சலாக மாற, 'அந்த கவலை வேண்டாம். நாங்கள் இருக்கிறோம்' என்று சகோதரர்களாக கை நீட்டினார்கள் பல நட்சத்திரங்களும் படைப்பாளிகளும். விவேக்குக்கு போன் செய்யலாமே என்று சிலரும், வேண்டாம் என்று சிலரும் முரண்பட, ஒரு தகவலாக சொல்லி வைக்கலாம் என்றுதான் அந்த துக்க செய்தியை சொன்னோம் அவருக்கு.

அவரது படத்திறப்பு தினமான நேற்று நேரில் வந்த விவேக், அந்த குடும்பத்திற்கு எப்போதும் நான் உதவியாக இருப்பேன் என்று கூறியதுடன் தனது சொந்த பணத்திலிருந்து ரூபாய் இரண்டு லட்சத்தை வழங்கினார். கருணாஸ், கஞ்சா கருப்பு, அமீர், பாலா, சரத்குமார், சத்யராஜ், சசிகுமார் என்று நீளும் அந்த இளகிய மனசுக்காரர்கள் வரிசையில் தன்னையும் இணைத்துக் கொண்ட விவேக்குக்கு அந்த குடும்பம் சார்பாக அத்தனை பேரும் நன்றி சொல்வதுதான் பொருத்தம்.

டி.ராஜேந்தரின் குறள் டிவி அலுவலத்தில் பணியாற்றிய ராதாராஜுக்கு வெறும் ஏழாயிரம் மட்டுமே கொடுக்கப்பட்டுள்ளது என்று முன்பே கூறியிருந்தோம். நேற்று செட்டில்மென்ட் தொகையாக 50 ஆயிரத்திற்கான காசோலையையும் கொடுத்தனுப்பியிருந்தார் டி.ராஜேந்தர்.

'பாண்டி பஜார்ல நடந்து போறவனையெல்லாம் இந்திரனே, சந்திரனேன்னு எழுதி ஹீரோவாக்குறீங்க. மந்திரியாக்குறீங்க. ஆனால் உங்களுக்கு ஒரு கஷ்டம்னா எல்லாருகிட்டேயும் கையேந்துற நிலைமை. இதை மாத்தணும். உங்களுக்கான பாதுகாப்புக்கு ஏதாவது செய்ய முன் வரணும். நான் என்ன செய்யணும்னு சொல்லுங்க. செய்றேன்' என்றார் அந்த நிகழ்ச்சியில் கலந்து கொண்ட அமீர்.

கூடினோம், அழுதோம், கலைந்தோம்... இனி அடுத்த சாவுக்கும் இதே வார்த்தைகளை கேட்க நேருமோ என்ற அச்சம் மட்டும் தொடர்ந்து கொண்டேயிருக்கிறது....!