இந்தியாவில் முதன் முறையாக 4 நாள் குழந்தையின் உறுப்புகள் தானம்

ரபீக் · ரபீக் Wed 14 Jul 2010 - 20:24

ஆந்திர மாநிலம் ஐதராபாத்தைச் சேர்ந்தவர் கிஷோர்குமார். இவர் ரெவின்யூ இன்ஸ்பெக்டராக பணிபுரிகிறார். இவரது மனைவி ஹேமாவதி ஆசிரியையாக உள்ளார். கடந்த 8-ந்தேதி இவருக்கு குறை பிரசவத்தில் பெண் குழந்தை பிறந்தது. எனவே அந்த குழந்தையை இன்கு பேட்டர் கருவியில் வைத்திருந்தனர்.

2 நாட்கள் மட்டுமே அக்குழந்தை நலமாக இருந்தது. அதன் பிறகு உடல் நிலை மோசம் அடைந்தது. 12-ந்தேதி அன்று அக்குழந்தைக்கு மூளை சாவு ஏற்பட்டதாக டாக்டர்கள் அறிவித்தனர். இதனால் கிஷோர்குமாரும், ஹேமாவதியும் அதிர்ச்சி அடைந்தனர்.

இதற்கிடையே அக்குழந்தையின் உடல் உறுப்புகள் நல்ல நிலையில் இருந்தன. எனவே அவற்றை தானமாக வழங்கலாம் என டாக்டர்கள் அறிவுறுத்தனர். அக்குழந்தையின் பெற்றோர் அதிர்ச்சியுடன் இருந்த நிலையில் உறவினர் ஒருவர் (மாமா) மட்டும் சகஜநிலையில் இருந்தார்.

இதை தொடர்ந்து அவரது சம்மதத்தின் பேரில், அக்குழந்தையின் உடல் உறுப்புகள் தானம் பெறும் நிகழ்ச்சிகள் நடந்தன. ஐதராபாத்தில் இருந்து செகந்திராபாத்தில் உள்ள இன்னோவா ஆஸ்பத்திரிக்கு அக்குழந்தை கொண்டு செல்லப்பட்டது.

அங்கு இதய வால்வுகள் மற்றும் கண்கள் அகற்றப்பட்டு தானமாக வழங்கப்பட்டது. குழந்தையிடம் இருந்து பெறப்பட்ட இதய வால்வுகள் வளர்ச்சி அடையாத அல்லது இதய வால்வுகள் இல்லாமல் பிறக்கும் குழந்தைகளுக்கு பொருத்தப்படும்.

எனவே தானமாக பெறப்பட்ட இவை மிகவும் பாதுகாப்பான முறையில் வைக்கப்பட்டுள்ளது. இது போன்று குழந்தையின் உடல் உறுப்புகளை தானமாக பெறுவது மிகவும் அரிதானது. ஏனெனில் பிறந்த குழந்தையின் உடல் உறுப்புகள் மிகவும் மெல்லியதாக இருக்கும் என டாக்டர்கள் தெரிவித்தனர்.

பிறந்த குழந்தையிடம் இருந்து உடல் உறுப்புகள் தானம் பெற்றது இந்தியாவில் இதுவே முதன் முறை என டாக்டர்கள் தெரிவித்தனர். மேலும் குழந்தையின் உடல் உறுப்புகளை தானம் வழங்கிய பெறறோர் மிகவும் போற்றி பாராட்டத்தக்கவர்கள் என்றும் புகழாரம் சூட்டினர்.