குறுந்தகவலில் காதல் சொன்னாய்..

குறுந்தகவலில் காதல் சொன்னாய்..

உன் தலையில்
சூடிய
மல்லிகையிலிருந்து
ஒன்றிரண்டு கீழே விழுகிறது.



நான் ஓடிவந்து
எடுத்துவிட வில்லை.

மண் இன்று
அதிஷ்டம் செய்திருப்பதாய்
நினைத்துக் கொண்டேன்!
------------------------------------------------

ஓடும் பேருந்தில்
முன்னே நீ நிற்கிறாய்
பின்னே நான் உனையே
பார்த்துக் கொண்டு நிற்கிறேன்

யாரோ என்னை
பொருக்கி என்று சொல்வதும்
உனக்குக் கேட்டிருக்கலாம்

இருந்தும் நீ
திரும்பிப் பார்க்காமலே
தலைகுனிந்துக் கொண்டதில்
தோற்றுத் தான் போனது நம் காதல்!
-------------------------------------------------

விடைபெற இயலா
தருணங்களில்;
நினைவுகளை நம்மோடு
அழைத்துக் கொள்வோம்;

நினைவுகளிலாவது நாம்
காதலராய் -

செர்ந்தேயிருப்போம்!
-----------------------------------------------


உன் வாசத்தில் ஒரு சொட்டு
உன் தாவணிப் பூவிலிருந்து
விழுகிறது -

அள்ளிப் பருகும் காற்றிடம்
கோபம் கொண்டு - உன்
தாவணியை பிடித்தேன் நான்

எனை முறைக்க வில்லை நீ
சிரிக்கவில்லை
பார்க்கிறாய்
பார்க்கிறாய்
அப்படி பார்க்கிறாய்

உன் தாவணி எடுத்து
இரு கை நிறைத்து உயிர்வரை
நுகர்கிறேன் நான்

உன் வாசம் என்னுள்ளே சென்று
என்னவோ செய்வதற்குள்
தாவணியை இழுத்துக் கொண்டு ஓடுகிறாய் நீ

காதலிக்கிறாய் என்னும் பதில்கள் மட்டும்
உன் தாவணிப் பூவிலிருந்து உதிர்ந்து
ஆம் ஆம் ஆம் என்றென கீழே
விழுந்து கொண்டே போகிறது!!

----------------------------------------------------------------------------

உன் கைகடிகாரப் பட்டையின்
உள்ளே சொருகி வைத்திருந்த

புகைவண்டியின் அனுமதி சீட்டு
கீழே விழுந்து விடுகிறது.

நீ எடுக்காமலே
புகைவண்டியிலிருந்து
இறங்கிப் போகிறாய்.

நான் தவற விட்டு விட்டாயோ
எப்படியேனும் -
எடுத்துக் கொடுப்பது போல் உன்னை
அருகில் வந்து பார்த்து விடலாமென
எடுத்துக் கொண்டு ஓடி வருகிறேன்.

நான் அருகில் வந்ததும்
நீ சிரித்துவிட்டு -
நான் தானே போட்டு வந்தேன்
ஏன் எடுத்து வந்தீர்கள் என்றாய்.

நான் சற்று முழிக்க
அங்கேயே சென்று போடுங்கள்
ஒரு நல்ல சேதி வருமென்று நீ சொன்னாய்.



ஓடி சென்று அங்கே போட்டேன்
என் அலைபேசியில் ஒரு

குறுந்தகவல் வந்தது,

குறுந்தகவலில் அந்த சீட்டை
பிரித்துப்
பார் என்றிருந்தது,

ஆவலோடு
பிரித்துப் பார்க்கிறேன்
நீ என்னை -
காதலிப்பதாய்
எழுதி இருந்தாய்.... என்றும் அன்புடன்.......அருண்........
-----------------------

எப்படிங்க இப்படியெல்லாம் யோசிக்க தோணுது , நம்மளால இப்படியெல்லாம் முடியாது , பாராட்டுக்கள்