காதலியைத்தேடிச் சென்ற காதலனை அடித்துக்கொன்ற கிராமத்தினர்!

ரபீக் · ரபீக் Tue Jul 13, 2010 12:01 pm

காதலியைத் தேடி கிராமத்துக்குச் சென்ற சென்னை வாலிபரை அக்கிராம மக்கள் ஒன்று திரண்டு அடித்துக் கொன்ற கொடூரம் பெரும் பரபரப்பை ஏற்படுத்தியுள்ளது.

சென்னை முகப்பேரைச் சேர்ந்த கார் ஓட்டுனர் வினோதும் பதினொன்றாம் வகுப்பு படித்து வந்த ராதிகா என்ற மாணவியும் ஒருவரையொருவர் விரும்பியுள்ளனர். இவர்களுக்கிடையிலான காதல் விவகாரம் அறிந்த ராதிகாவின் பெற்றோர், அவரின் படிப்பை நிறுத்தி விட்டு அவர்களின் சொந்த ஊரான திருவண்ணாமலை மாவட்டத்திலுள்ள ஆலத்தூர் கிராமத்துக்கு அழைத்துச் சென்று விட்டனர்.

கடந்த வெள்ளிக்கிழமை காலை ராதிகா வினோதைத் தொலைபேசியில் அழைத்து, "தான் ஆலத்தூர் கிராமத்தில் உள்ளதாகவும் தன்னைப் பாட்டி வீட்டில் அடைத்து வைத்து கொடுமைபடுத்துவதாகவும் எப்படியாவது வந்துத் தன்னை அழைத்துச் செல்லுமாறும்" கூறியதாக தெரிகிறது.

இதையடுத்து அன்றே ஆத்தூர் கிராமத்துக்குக் கிளம்பிய வினோத், அன்று இரவு 7 மணிக்கு ராதிகாவின் வீட்டுக்குச் சென்றுள்ளார். ராதிகாவைத் தேடி வினோத் வந்ததைப் பார்த்து விட்ட ராதிகாவின் உறவினர்கள், வினோதை வழிமறித்து தாக்கியதாக கூறப்படுகிறது. வினோத் தாக்கப்படும் நேரத்தில் தன் நண்பர்களைத் தொலைபேசியில் அழைத்து, "என்னை ஒரு ஊரே சேர்ந்து அடிக்கிறது" என்றும் எப்படியாவது தன்னைக் காப்பாற்றும்படியும் கேட்டுள்ளார். அவர் பேசிக்கொண்டிருக்கும் வேளையிலேயே தொலைபேசி இணைப்பு துண்டிக்கப்பட்டதாக அவர் நண்பர்கள் கூறுகின்றனர்.

இந்நிலையில் இன்று காலை 9 மணி அளவில், ஆத்தூருக்கு அருகிலுள்ள கடநாடியில் ஒரு கிணற்றில் வினோத்தின் சடலம் மிதந்தது. உடலை மீட்டக்காவல்துறையினர் வினோதின் உறவினர்களுக்குத் தகவலளித்தனர். வினோத் தன்னை ஊரே திரண்டு தாக்குவதாக தொலைபேசியில் கூறினார். ஆத்தூர் கிராமத்தினர் தான் அவரைக் கொன்று வீசியுள்ளனர். அவர்கள் மீது நடவடிக்கை எடுக்க வேண்டும் என வினோதின் உறவினர்கள் காவல்துறையில் புகார் அளித்ததையடுத்து காவல்துறையினர் வழக்கு பதிவு செய்து விசாரணை நடத்தி வருகின்றனர்.