ஆடைக் கட்டுப்பாட்டைக் கோரும் மத்திய அமைச்சர்!

இந்தியா வரும் வெளிநாட்டு சுற்றுலாப்பயணிகளுக்கு ஆடை கட்டுப்பாட்டை வலியுறுத்த வேண்டும்; அவர்களுக்கு ஆடை கட்டுப்பாட்டைக் குறித்து விளக்க வேண்டும்" என்று மத்திய சுற்றுலாத்துறை அமைச்சர் குமாரி செல்ஜா கூறியுள்ளார்.

"இந்தியாவுக்கு வரும் சுற்றுலாப் பயணிகளிடம், நாம் மரியாதையுடனும், கண்ணியத்துடனும் நடந்து கொள்ள வேண்டும். அதே வேளையில், அவர்களிடம் சற்று எச்சரிக்கையுடனும் இருக்க வேண்டும்.

வெளிநாட்டு பயணிகள் அவர்கள் நாட்டு கலாசாரத்திற்கு ஏற்ப ஆடை அணிகின்றனர். ஆனால், இத்தகைய ஆடைகளால் நமது நாட்டில், விரும்பத்தகாத சம்பவங்கள் நடைபெற காரணமாகிவிடுகிறது. எனவே, அவர்களுக்கு ஆடை கட்டுப்பாடு குறித்து விளக்க வேண்டும்.

இதனை, அவர்கள் தங்கியிருக்கும் ஓட்டல் நிர்வாகத்தினரே கூட செய்யலாம். ஆடை கட்டுப்பாட்டை கடைபிடிக்கும்போது, நமக்கும், அவர்களுக்கும் பயணம் இனிமையாக அமையும். சுற்றுலாப் பயணிகள், தங்களது தினசரி சுற்றிப் பார்க்கச் செல்லும் இடங்களை, பாதுகாப்பு கருதி, ஓட்டல் நிர்வாகத்திடம் தெரிவித்துவிட்டு செல்ல வேண்டும்.

அதே போன்று ஓட்டல் நிர்வாகமும், பெண் சுற்றுலாப் பயணிகளுக்கு உரிய பாதுகாப்பு ஏற்பாடுகளை செய்துத் தரலாம். அவரவர் பணிகளை சரியாக செய்வதன் மூலம், நமது நாட்டுக்கு வரும் சுற்றுலாப் பயணிகள் பாதுகாப்பாக நாடு திரும்புவதுடன், நமது கண்ணியமும் காக்கப்படும்" என்று நிகழ்ச்சி ஒன்றில் பேசிய மத்திய சுற்றுலாத் துறை அமைச்சர் குமாரி செல்ஜா வலியுறுத்தியுள்ளார்.

வெளிநாட்டிலிருந்து இந்தியா வரும் சுற்றுலாப்பயணிகளில் பெண் சுற்றுலாப்பயணிகள் மீது வன்புணர்வு தாக்குதல்கள் அதிகரித்து வரும் நிலையில், மத்திய சுற்றுலாத்துறை அமைச்சரின் இந்த வேண்டுகோள் முக்கியத்துவம் பெற்றதாகிறது.