பள்ளி, மருத்துவமனைகளுக்கு மானியம் அளியுங்கள்: மான்டேக் சிங்

லாபத்தில் இயங்கும் எண்ணெய் நிறுவனங்களுக்கு மானியம் அளிப்பதை விட்டுவிட்டு, பள்ளிகள், மருத்துவமனைகளுக்கு மானியம் வழங்க வேண்டும் என்று மத்திய அரசை திட்டக் குழு துணைத் தலைவர் மான்டேக் சிங் அலுவாலியா வலியுறுத்தியுள்ளார்.
தில்லியில் ஞாயிற்றுக்கிழமை தொலைக்காட்சிக்கு அளித்த பேட்டியில் அவர் மேலும் கூறியிருப்பது: மத்திய அரசு வழங்கும் மானியத்தால் எண்ணெய் நிறுவனங்களின் லாபம் அதிகரித்து வருகிறது. இவ்வாறு இல்லாமல் பள்ளிகள் மற்றும் மருத்துவமனைகளுக்கு மத்திய அரசு நிதியை வழங்கினால் அது மிகவும் உபயோகமாக இருக்கும்.

எண்ணெய் நிறுவனங்கள் இப்போது லாபத்தில் செயல்பட்டத் தொடங்கியுள்ளன. ஆனால் இப்போதும் அவற்றை வீழ்ச்சியில் இருந்து மீட்பதாக மத்திய அரசு கூறிவருகிறது. 2009-10-ம் ஆண்டில் இந்தியன் ஆயில் நிறுவனம் ரூ. 10,220 கோடி லாபம் ஈட்டியுள்ளது. அரசு வழங்கும் அதிகபடியான மானியம் தான் இவ்வளவு அதிக லாபத்துக்கு முக்கியக் காரணம்.

பொதுமக்கள் தங்களது பைக், கார்கள் போன்றவற்றை போக்குவரத்துக்கு பயன்படுத்துவதைத் தவிர்த்து, முடிந்த அளவுக்கு பேருந்து, ரயில் போன்றவற்றை பயன்படுத்த அரசு அதிக முயற்சி மேற்கொள்ள வேண்டும் என்றார் அலுவாலியா.

அமைச்சருக்கு பதில்: அண்மையில் மத்திய சாலைப் போக்குவரத்துத் துறை அமைச்சர் கமல்நாத் திட்டக்குழு கட்டளையிடும் அதிகார அமைப்பாகத்தான் உள்ளது; செயல்பாடுகள் சிறப்பாக இல்லை என்று மான்டேக் சிங் முன்னிலையில் கடுமையாக விமர்சித்தார்.

இது தொடர்பான கேள்விக்கு பதில் அளித்த அலுவாலியா, சாலைகளை எப்படி போட வேண்டும் என்று தெரிந்தவர்களை மட்டுமே வைத்து அரசு நடத்திவிட முடியாது. திட்டங்களை வகுத்துக் கொடுப்பதன் மூலம் தான் பணிகள் விரைவாகவும், சிறப்பாகவும் நடைபெறும். எழுத்தில் உள்ள வழிகாட்டு நெறிமுறைகள் சாலை அமைப்பதில் இருந்து முற்றிலும் வேறுபட்டவை. நாங்கள் திட்டங்களை செயல்படுத்தும் அமைப்பு இல்லை. அரசின் ஒவ்வொரு பிரிவும் வெவ்வேறு பணிகளைச் செய்து வருகின்றன என்றார்.

நாளொன்றுக்கு 20 கி.மீ. தூர நெடுஞ்சாலை அமைக்க வேண்டும் என்ற தனது துறையின் இலக்கை எட்டுவதற்கு திட்டக்குழு அனுமதிக்கவில்லை என்றும் கமல்நாத் கூறியிருந்தார். இதற்கு பதிலளித்த அலுவாலியா, இது முற்றிலும் உண்மையல்ல, நிதி எவ்வளவு கிடைக்கிறதோ, அதற்கு எற்பத்தான் இலக்கு அமைக்க முடியும் என்றார்.