11 வருடமாக முதல்வன் விருது ராஜ்.டிவி யின் கல்விப் பணி

கடந்த பத்து வருடங்களாக முதல்வன் விருது என்ற சிறப்பான நிகழ்ச்சியை நடத்தி வருகிற ராஜ் டி.வி நிறுவனம் இந்த வருடம் இன்னும் பிரமாண்டமாக இந்த நிகழ்ச்சியை நடத்தவிருக்கிறது. அதை பற்றி விளக்குவதற்கு முன்... முதல்வன் விருது பற்றி ஒரு குறிப்பு.

தமிழகம் முழுவதும் இருந்து முதல் +2, மற்றும் 10 வகுப்புகளில் முதல் மதிப்பெண் பெற்ற மாணவ மாணவிகளை சென்னைக்கு வரவழைத்து அவர்களை கவுரவிக்கிற நிகழ்ச்சிதான் இது. ஒவ்வொரு மாவட்டத்திலிருந்தும் தேர்வு செய்யப்படுகிற அத்தனை மாணவர்களையும் சென்னைக்கு வரவழைத்து நட்சத்திர ஓட்டலில் தங்க வைத்து ஒவ்வொருவரையும் தனித்தனி காரில் சென்னையில் உள்ள முக்கியமான இடங்களை சுற்றிக்காட்டி விருதும், பரிசுமாக திருப்பி அனுப்பி வருகிறது ராஜ்.டி.வி நிர்வாகம். இந்த முறை 81 மாணவர்கள் சென்னைக்கு வரவழைக்கப்படுவார்களாம். ஒவ்வொரு மாணவருக்கும் தலா 25 ஆயிரம் மதிப்புள்ள பரிசுப்பொருட்களும் வழங்கப்படுகிறது.

இம்மாதம் 24 ந் தேதி காமராஜர் அரங்கில் நடைபெறவுள்ள இந்த நிகழ்ச்சியில் மத்திய அமைச்சர் ஜெகத்ரட்சகன், மற்றும் அண்ணா பல்கலைக்கழக துணை வேந்தர் மன்னர் ஜவகர் ஆகியோர் கலந்து கொள்கிறார்கள். முன்னதாக மாணவ, மாணவிகள் கவர்னர் மாளிகை சென்று அவருடன் கலந்துரையாடும் நிகழ்ச்சியும் ஏற்பாடு செய்யப்பட்டுள்ளதாக ராஜ் டி.வியின் நிர்வாக இயக்குனர் ரவி தெரிவித்தார்.

ராஜ்.டிவி நிறுவனத்துடன் இணைந்து இந்த விழா சிறப்புடன் நடைபெற பணியாற்றிக் கொண்டிருக்கிறார் செவன்த் சேனல் நிறுவனத்தில் முக்கிய பங்காற்றி வந்த மாலா மணியன். தற்போது இவர் ராஜ் டி.வி யில் செயல் அதிகாரியாக நியமிக்கப்பட்டிருக்கிறார். இந்த நிகழ்ச்சியில் முன்பு கலந்து கொண்டு பரிசு பெற்ற பழைய மாணவ மாணவியர் தற்போது எங்கிருந்தாலும் வந்து கலந்து கொள்ளும்படி கேட்டுக் கொள்கிறது ராஜ்.டி.வி