பழிவாங்குவது என் குணம் அல்ல - இராம.நாராயணன் பேச்சு

பலரும் எதிர்பார்த்தபடியே மீண்டும் வென்றிருக்கிறது இராம.நாராயணன் அணி. தமிழ் திரைப்பட தயாரிப்பாளர் சங்க தேர்தல் ஜுலை 11-ந் தேதி சென்னையில் நடந்தது. மூத்த தயாரிப்பாளர் ஆர்.எம்.வீரப்பன், இயக்குனர் சிகரம் பாலசந்தர், சூப்பர் ஸ்டார் ரஜினி உள்ளிட்ட பலரும் வாக்களித்த இந்த தேர்தலில் இராம.நாராயணன் தலைமையிலான அணி வெற்றி வாகை சூடியுள்ளது. எதிர்த்து நின்ற கே.ஆர்.ஜி அணிக்கு தோல்வியே கிடைத்துள்ளது.

பதிவான வாக்குகள் 576. இதில் இராம.நாராயணனுக்கு மட்டும் 428 வாக்குகள் கிடைத்தது. இவரது அணியில் இரண்டு துணை தலைவர்களுக்கு போட்டியிட்ட எஸ்.ஏ.சந்திரசேகரன் 391, கே.பிரபாகரன் 441, இரு கவுரவ செயலாளர்களுக்கு போட்டியிட்ட சிவசக்தி பாண்டியன் 359, கே.முரளிதரன் 334, பொருளாளர் காஜா மைதீன் 389 வாக்குகளும் பெற்று வெற்றி பெற்றனர்.

தேர்தலுக்கு முந்தைய தினம் இராம.நாராயணன் அணி சார்பாக ஒரு சிறப்பு கூட்டம் நடத்தப்பட்டது. அதில் பேசிய பெப்சி தலைவர் வி.சி.குகநாதன், தலைவர் இராம.நாராயணனுக்கு ஒரு யோசனை கூறினார். கிராமபுறங்களில் வீட்டுக்குள் நல்ல பாம்பு வந்துவிட்டால் அதை அடித்து அப்படியே து£க்கி வீசிவிட மாட்டார்கள். அதை எரித்துவிடுவார்கள். அதுபோல எதிரிகளில் நல்ல பாம்பு யார் யார் என்பதை இனம் கண்டு அதை நீங்கள் எரித்துவிட வேண்டும் என்று கூறினார். பின்னாலேயே பேச வந்த இராம.நாராயணன் அவரது யோசனைக்கு அற்புதமாக ஒரு பதிலை சொன்னார். நான் பாம்புகளை வைத்து படம் எடுத்தவன். அவைகளை கொன்றுவிடக் கூடாது. கொளுத்திவிடவும் கூடாது. அன்போடு அவைகளுடன் பழகி நம்முடனேயே வைத்துக் கொள்ள வேண்டும் என்றார். அதே கூட்டத்தில் பலரும் கே.ஆர்.ஜியை தரக்குறைவாக பேச முற்படும் போதெல்லாம் தடுத்து நிறுத்தியதும் இவர்தான்.

இந்த நல்ல உள்ளத்தின் காரணமாகதான் அவருக்கு தொடர் வெற்றி கிடைக்கிறது என்று பலரும் பாராட்டியபடி கலைந்தார்கள். தொடர்ந்து மூன்றாவது முறையாக வென்று தனது நற் பண்பை நிரூபித்திருக்கிறார் இராம.நாராயணன்.