சோதனையில் முடிந்த குளோஸின் சாதனை

by ரபீக் Mon Jul 12, 2010 11:07 am

ஜெர்மனி வீரர் மிரோஸ்லேவ் க்ளோஸ் காயம் காரணமாக 3-வது இடத்துக்கான போட்டியில் ஆடும் வாய்ப்பை இழந்ததால் ரொனால்டோவின் சாதனையை முறியடிக்கும் வாய்ப்பை தவறவிட்டார்.

ஜெர்மனி கால்பந்து அணியின் நட்சத்திர வீரர்களில் ஒருவர் மிரோஸ்லேவ் க்ளோஸ். 2002, 2006 உலகக் கோப்பைகளில் விளையாடியுள்ள க்ளோஸ், 10 கோல்கள் அடித்திருந்தார்.

இந்நிலையில் தென்னாப்பிரிக்காவில் நடைபெற்ற 2010 உலகக் கோப்பை கால்பந்து போட்டியில் பங்கேற்ற க்ளோஸ், லீக் சுற்றில் ஆஸ்திரேலியாவுக்கு எதிரான ஆட்டத்தில் ஒரு கோல், இரண்டாவது சுற்றில் இங்கிலாந்துக்கு எதிராக ஒரு கோல், காலிறுதியில் ஆர்ஜென்டீனாவுக்கு எதிராக இரண்டு கோல்கள் என மொத்தம் 4 கோல்கள் அடித்திருந்தார்.இதனால் 3 உலகக் கோப்பையும் சேர்த்து அவர் 14 கோல்கள் அடித்திருந்தார். மேலும் அவர் இரண்டு கோல் அடித்தால் உலகக் கோப்பையில் 15 கோல்கள் அடித்துள்ள பிரேசில் வீரர் ரொனால்டோவின் சாதனையை முறியடிப்பார் என்று எதிர்பார்க்கப்பட்டது. ஆனால் ஸ்பெயினுக்கு எதிரான அரை இறுதி ஆட்டத்தில் க்ளோஸ் உள்ளிட்ட ஜெர்மனி வீரர்கள் கோல் அடிக்கவில்லை.

இந்நிலையில் மூன்றாவது இடத்திற்கான ஆட்டத்தில் உருகுவேக்கு எதிராக கோல் அடித்து ரொனால்டோவின் சாதனையை க்ளோஸ் சமன் செய்வார் என ரசிகர்கள் எதிர்பார்த்திருந்தனர். ஆனால் துரதிருஷ்டவசமாக க்ளோஸýக்கு முதுகில் காயம் ஏற்பட்டதால் அவர் சனிக்கிழமை இரவு நடைபெற்ற உருகுவேக்கு எதிரான ஆட்டத்தில் பங்கேற்கவில்லை. முதுகில் ஏற்பட்ட காயம் க்ளோஸின் சாதனைக்கு சோதனையாக அமைந்ததால் ஜெர்மனி ரசிகர்கள் மிகுந்த வருத்தமடைந்துள்ளனர். 32 வயதான மிரோஸ்லேவ் க்ளோஸ், இந்த உலகக் கோப்பையோடு ஓய்வுபெறுவார் என்று எதிர்பார்க்கப்படுகிறது.