ரோசய்யாவுக்கு சோனியா கொடுத்த பிச்சைதான் முதல் மந்திரி பதவி: சந்திரபாபு நாயுடு

ரோசய்யாவுக்கு ஆட்சியை காப்பாற்றவே நேரம் சரியாக உள்ளது. அதிலேயே முழு நேரத்தையும் செலவிடுகிறார். ரோசய்யாவுக்கு சோனியா கொடுத்த பிச்சைதான் முதல் மந்திரி பதவி. ஆனால் 1 வாரம் என்னை முதல்-மந்திரியாக இருக்கும்படி கூப்பிடுகிறார் என்று சந்திரபாபு நாயுடு தெரிவித்துள்ளார்.
தெலுங்கு தேசம் கட்சித் தலைவர் சந்திரபாபுநாயுடு திருப்பதியில் நிருபர்களிடம் கூறியதாவது:-

ஆந்திராவில் காங்கிரஸ் ஆட்சிக்கு பக்கவாதம் வந்து விட்டது. காங்கிரஸ் அரசு செயல்படவில்லை. ஆட்சியும் நடக்கவில்லை. எந்த நலத்திட்டமும் அமுல் படுத்தப்படவில்லை.

ரோசய்யாவுக்கு ஆட்சியை காப்பாற்றவே நேரம் சரியாக உள்ளது. அதிலேயே முழு நேரத்தையும் செலவிடுகிறார். ரோசய்யாவுக்கு சோனியா கொடுத்த பிச்சைதான் முதல் மந்திரி பதவி. ஆனால் 1 வாரம் என்னை முதல்-மந்திரியாக இருக்கும்படி கூப்பிடுகிறார்.

ராஜசேகர ரெட்டி மரணத்துக்கு பிறகு ரோசய்யாவை கூப்பிட்டு முதல்-மந்திரி பதவி கொடுத்துள்ளனர். அதை இன்னொருவருக்கு கொடுக்க விரும்புவது எந்த வகையில் நியாயம். மக்கள் கொடுத்த பதவியை மட்டுமே நான் ஏற்றுக் கொள்வேன்.

முதல்-மந்திரி பதவியை பிடிக்க ஜெகன்மோகன் ரெட்டி போராடுகிறார். முதல்-மந்திரி பதவியை தக்க வைத்துக் கொள்ள ரோசய்யா போராடுகிறார்.

நான் ஆட்சியில் இருந்த போது 9 ஆண்டு காலம் மாநிலத்தை முன்னேற்ற பாதைக்கு அழைத்து சென்றேன். ராஜசேகர ரெட்டி முதல்வராக பதவி வகித்து மாநிலத்தை இருட்டாக்கி விட்டார். மாநிலத்தின் முன்னேற்றத்துக்கு எதுவும் செய்யவில்லை. இலவச திட்டங்களை அறிவித்து வளர்ச்சியை தடுத்து விட்டார்.

அவர் சம்பாதித்த ஊழல் பணத்தை ஜெகன் மோகன்ரெட்டி வாரி இறைக்கிறார். ராஜசேகர ரெட்டி மரணம் அடைந்த போது தற்கொலை செய்து கொண்ட 690 பேரின் குடும்பங்களுக்கு தலா ரூ.1 லட்சம் வீதம் ரூ.7 கோடி வழங்குகிறார். இந்த பணம் எப்படி வந்துது என்பதை ஜெகன்மோகன் ரெட்டி கணக்கு காட்ட வேண்டும்.

இவ்வாறு அவர் கூறினார்.