தயாரிப்பாளர் சங்க தேர்தல்: ரஜினி, குஷ்பு ஓட்டு போட்டனர் பலத்த போலீஸ் பாதுகாப்பு

தமிழ் திரைப்பட தயாரிப்பாளர் சங்க தேர்தல் அண்ணா மேம்பாலம் அருகில் உள்ள பிலிம் சேம்பர் தியேட்டரில் இன்று நடந்தது. ஓய்வு பெற்ற நீதிபதி சிவசுப்பிரமணியன் தேர்தல் அதிகாரியாக இருந்து இதனை நடத்தினார். காலை 9 மணிக்கு ஓட்டுப் பதிவு தொடங்கியது. தியேட்டர் முன்னால் ஏராளமான போலீசார் குவிக்கப்பட்டிருந்தனர். வேட்பாளர்கள் திரண்டு நின்று தங்கள் அணிக்கு ஆதரவு திரட்டினார்கள். மொத்தம் 700 பேர் ஓட்டு போட தகுதியானவர்கள். மதியம் வரை 50 சதவீதம் ஓட்டு பதிவானது.

இந்த தேர்தலில் ராமநாராயணன் தலைமையில் ஒரு அணியும், கே.ஆர்.ஜி. தலைமையில் இன்னொரு அணியும் போட்டியிட்டன. ராமநாராயணன் மீண்டும் தலைவர் பதவிக்கு நிற்கிறார்.

அவரது அணி சார்பில் துணை தலைவர்கள் பதவிக்கு அன்பாலயா பிரபாகரன், எஸ்.ஏ. சந்திரசேகரன் ஆகியோரும், செயலாளர்கள் பதவிக்கு சிவசக்தி பாண்டியன், முரளிதரன் ஆகியோரும் பொருளாளர் பதவிக்கு காஜாமைதீனும் போட்டியிடுகின்றனர். இதே அணியில் செயற்குழு உறுப்பினர் பதவிக்கு குஷ்பு போட்டியிடுகின்றார்.

கே.ஆர்.ஜி. தலைவராக போட்டியிடும் அணியில் ராம கோட்டை குமார் துணை தலைவர் பதவிக்கும், ஆர்.ராதாகிருஷ்ணன், பி.எல். தேனப்பன் ஆகியோர் செயலாளர்கள் பதவிக்கும், பாபுகணேஷ் பொருளாளர் பதவிக்கும் போட்டியிடுகின்றனர்.

செயற்குழு உறுப்பினர்கள் பதவிக்கு 40 பேர் போட்டியிடுகிறார்கள். இதில் 21 பேர் தேர்ந்தெடுக்கப்படுகிறார்கள்.

தயாரிப்பாளர் சங்கத்தில் ரஜினி, விஜயகாந்த், சரத்குமார், குஷ்பு உள்ளிட்ட நடிகர்-நடிகைகள் 12 பேர் உறுப்பினர்களாக உள்ளனர்.

ரஜினி காலை 11 மணிக்கு மகள் சவுந்தர்யாவுடன் வந்து ஓட்டு போட்டார். பின்னர் ரஜினி நிருபர்களிடம் கூறும் போது, “எந்தி ன் படப்பிடிப்பை 3 தினங்களுக்கு முன்பு முடித்து விட்டு சென்னை திரும்பினேன். தயாரிப்பாளர் சங்க தேர்தலில் ஓட்டு போடுவதற்காக இங்கு வந்தேன். எந்திரன் படம் ஆகஸ்டு மாதம் ரிலீசாகிறது” என்றார்.

நடிகர்கள் சரத்குமார், பார்த்திபன், ராமராஜன், ராதாரவி, சுந்தர்.சி, எஸ்.வி.சேகர், கருணாஸ், நடிகைகள் ராதிகா, தேவயானி, பெப்சி தலைவர் வி.சி.குகநாதன், கே.பாலச்சந்தர், கலைப்புலி தாணு, ராம்குமார், கோவைத் தம்பி, எஸ்.ஏ. சந்திரசேகரன், பழ.கருப்பையா, அமுதா துரைராஜ், அழகன் தமிழ் மணி, கமீலாநாசர், கதிரேசன், மாதேஷ், மனோஜ்குமார், எச்.முரளி, பவித்ரன், சங்கிலி முருகன், ஆர்.கே.செல்வமணி, எஸ். பி.பி.சரண், எஸ்.எஸ்.சக்கரவர்த்தி, ஜெயதேவி, இயக்குனர் நாஞ்சில் பி.சி. அன்பழகன், புவனா, நம்பிராஜ், ஜாக்குவார் தங்கம், உள்பட பலர் ஓட்டு போட்டனர்.

மாலை 4.30 மணிவரை வாக்குப்பதிவு நடக்கிறது. பின்னர் ஓட்டுகள் எண்ணப்பட்டு இன்று இரவே முடிவுகள் அறிவிக்கப்படுகின்றன.