மருத்துவ கழிவுகளை தமிழகத்தில் கொட்ட வந்த கேரள லாரிகள் சிறை பிடிப்பு

ரபீக் · ரபீக் Sat Jul 10, 2010 1:23 pm

மருத்துவக் கழிவுகளை தமிழகத்தின் பகுதிகளில் கொட்டிச் செல்வதற்காக வந்த கேரள லாரிகைளை பெரியார் திகவினர் சிறைப்பிடித்துள்ள சம்பவம் பரபரப்பை ஏற்படுத்தியுள்ளது.

மருத்துவக் கழிவுகள் மற்றும் வேதியியல் கழிவுகள் நிரம்பிய லாரிகளை தமிழக பகுதிகளில் கொட்டிவிட்டு செல்லும் கயமைத்தனம் பல காலமாக நடந்து வருகிறது. இது குறித்த மக்கள் போராட்டங்கள் மற்றும் கோரிக்கைகள் குறித்து அரசுகள் எவ்வித நடவடிக்கையும் இதுவரை எடுக்கவில்லை.

கேரளாவில் இருந்து மருத்துவக் கழிவுகளை சுமந்து வரும் லாரிகள் பொள்ளாச்சி அருகே கொட்டிவிட்டு சென்று விடுவது வாடிக்கையான ஒன்றாக மாறியது. இந்நிலையில் வியாழக் கிழமையன்று கேரளாவில் இருந்து மருத்துவ கழிவுகளை கொட்டுவதற்காக தமிழக எல்லையில் நுழைந்த லாரிகளை பெரியார் திராவிடர் கழகத்தினர் மற்றும் பொதுமக்கள் மடக்கிப் பிடித்தனர். ஓட்டுனர் மற்றும் கிளீனர் இருவரும் காவல்துறையினரிடம் ஒப்படைக்கப்பட்டனர்.

தமிழக அரசு தகுந்த நடவடிக்கை எடுக்கவில்லை எனில் பெரும் போராட்டங்களில் குதிப்போம் என அப்பகுதி மக்கள் எச்சரித்துள்ளனர்.