தன்னையே மறந்திருக்கும் ஜோர்ஜ் பெர்னாண்டஸ்

தன்னையே மறந்திருக்கும் ஜோர்ஜ் பெர்னாண்டஸ்
இந்தியாவின் முன்னாள் பாதுகாப்பு அமைச்சர் ஜோர்ஜ் பெர்னாண்டஸ் இன்று தன்னை மறந்த நிலையில் இருக்கின்றார். அல்kமர் நோயினால் பீடிக்கப்பட்டிருக்கும் அவர் ஞாபக சக்தியை முற்றாக இழந்துவிட்டார்.

நீண்ட காலமாக ஜோர்ஜ் பெர்னாண்டஸ்ஸை விட்டுப் பிரிந்திருந்த மனைவி லீலா கபீர் இப்போது அவரை அழைத்துச் சென்று தனது பராமரிப்பில் வைத்திருக்கின்றார். அவரது சகோதரர்கள் தங்கள் பராமரிப்பில் அவரை விட வேண்டும் என்று வழக்குத் தாக்கல் செய்திருக்கின்றார்கள்.

ஜோர்ஜ் பெர்னாண்டஸ் அரசியல் வாழ்வில் நிலையான கொள்கையைப் பின்பற்றியவரல்ல. இவர் பிரசித்தி பெற்ற ரயில்வே வேலை நிறுத்தத்துக்குத் தலைமை தாங்கியதன் மூலம் சோஷலிசவாதியாக அரசியலுக்கு வந்தவர். பிற்காலத்தில் பாரதிய ஜனதா கட்சி அரசாங்கத்தில் பாதுகாப்பு அமைச்சராகப் பதவி வகித்ததோடு அக்கட்சிக்கு மிகவும் விசுவாசமானவராகவும் மாறினார்.

மொரார்ஜி தேசாயின் தலைமையில் 1977 மார்ச் மாதம் பதவிக்கு வந்த ஜனதா கட்சி அரசாங்கம் 1979ம் ஆண்டு நெருக்கடிக்கு முகங்கொடுத்தது. அந்த அரசாங்கத்தில் பாரதிய ஜன சங் கட்சியும் ஒரு பங்காளி. இக் கட்சிதான் பிற்காலத்தில் பாரதிய ஜனதா கட்சி எனப் பெயர் மாற்றம் பெற்றது. அந்த அரசாங்கத்தில் கபினற் அமைச்சர்களான ஏ. பி. வாஜ்பாயும் எல். கே. அத்வானியும் தீவிர இந்துத்துவ அமைப்பாகிய ஆர். எஸ். எஸ்ஸிலும் உறுப்பினர்கள். இவர்கள் ஆர். எஸ். எஸ்ஸில் அங்கத்துவம் வகிக்கக் கூடாது என்று கட்சிக்குள் ஒரு சாரார் கூறினார்கள்.

இவ்விருவரும் ஆர். எஸ். எஸ்ஸிலிருந்து இராஜினாமாச் செய்யாவிட்டால் அரசாங்கத்திலிருந்து வெளியேற்றப்பட வேண்டும் என்ற கருத்தைத் தீவிரமாக வலியுறுத்தியவர் ஜோர்ஜ் பெர்னாண்டஸ். பின்னர் அவரே ஆர். எஸ். எஸ்ஸின் கட்டுப்பாட்டுக்கு உட்பட்ட பாரதிய ஜனதா கட்சியின் அரசாங்கத்தில் பாதுகாப்பு அமைச்சராகப் பதவியேற்றார்.

ஆர். எஸ். எஸ் வெளியிடும் சஞ்சிகையான ‘பஞ்ச ஜன்யா’ வின் ஒரு இதழ் ஜோர்ஜ் பெர்னாண்டஸ்ஸின் படத்தை அட்டைப் படமாகக் கொண்டிருந்தது. ஆர். எஸ். எஸ் உறுப்பினராகவும் இந்துவாகவும் இல்லாத ஒருவர் (ஜோர்ஜ் பெர்னாண்டஸ் கிறிஸ்தவர்) ‘பஞ்ச ஜன்யா’வின் அட்டைப் படத்தில் இடம்பெற்றது அதுவே முதல் தடவை அந்தளவுக்கு ஜோர்ஜ் பெர்னாண்டஸ் ஆர். எஸ். எஸ்ஸ¤க்கு நெருக்கமானவராக மாறியிருந்தார். ஆர். எஸ். எஸ்ஸைக் கடுமையாக விமர்சித்த கிறிஸ்தவர் அதன் சஞ்சிகையின் அட்டைப் படத்தில் இடம்பெறும் அளவுக்கு நிலைமை மாறியது.

ஜோர்ஜ் பெர்னாண்டஸ் அரசியலு க்கு வந்த காலத்திலேயே அவரது மனைவி அவரை விட்டுப் பிரிந்து சென்றுவிட்டார். இறுதிக் காலத்தில் சமதா கட்சி யின் முன்னாள் தலைவியான ஜெயா ஜெய்ட்லிக்கும் அவருக்குமிடையே நெருக்கமான உறவு இருந்தது. அல்kமர் நோயினால் பீடிக்கப்பட்ட பின் ஜெயா ஜெய்ட்லியே அவரைக் பராமரித்து வந்தார். இந்த நிலையிலேயே அவரது மனைவி லீலா கபீர் வந்து அவரைத் தன்னுடன் கூட்டிச் சென்றார்.

ஜோர்ஜ் பெர்னாண்டஸ்ஸின் சகோதரர்கள் அவரைத் தங்கள் பராமரிப்பில் விட வேண்டும் என்று வழக்கும் தாக்கல் செய்திருக்கின்றார்கள். நீண்ட காலமாகக் கணவனைக் கைவிட்டு வாழ்ந்த லீலா கபீர் அவரைச் சரியாகக் கவனிக்க மாட்டார் என்பது இவர்களின் வாதம். இவர்களுக்குப் பின்னால் ஜெயா ஜெய்ட்லி இருப்பதாகப் பேசப்படுகின்றது. ஜோர்ஜ் பெர்னாண்டஸ்ஸின் பெயரில் ஏராளம் சொத்துகள் இருப்பது குறிப்பிடத்தக்கது.