சூரிய ஒளியில் பறக்கும் விமானம் கண்டுபிடிப்பு

by அப்புகுட்டி Sat Jul 10, 2010 1:12 am

பெட்ரோல் இல்லாமல் சூரிய ஒளி சக்தி மூலம் இரவு நேரத்திலும் பறக்கும் திறனுயை அதி நவீன விமானம், சுவிட்சர்லாந்தில் தயாரிக்கப்பட்டுள்ளது. இந்த விமானத்தின் சோதனை வெற்றிகரமாக நடந்தது. தற்போது விமானங்கள் விசேட பெட்ரோலால் இயக்கப்படுகின்றன.

பெட்ரோலுக்கு பதிலாக சூரிய ஒளியின் சக்தியில் பறக்கும் விமானத்தை சுவிட்சர்லாந்தைச் சேர்ந்த ஆண்ட்ரூ போர்ச்பெர்க் என்பவர் வடிவமைத்துள்ளார். இவர் ஜெட் விமானங்களை ஓட்டிய அனுபவம் உடையவர்.

இந்த விமானத்தின் இறக்கைகள், 207 அடி நீளம் உடையவை. இந்த இறக்கைகளில், சூரிய ஒளியை ஈர்த்து சேமித்து வைக்கும் திறன் வாய்ந்த 12 ஆயிரம் தகடுகள் மற்றும் பட்டரிகள் பொருத்தப்பட்டுள்ளன. இதற்கு முன் தயாரிக்கப்பட்ட சூரிய ஒளி சக்தி விமானங்கள், குறுகிய நேரம் மட்டுமே பறக்கக் கூடியதாக வடிவமைக்கப்பட்டிருந்தன.

இதை முறியடிக்கும் வகையில், தொடர்ந்து நீண்ட நேரம் பறப்பதுடன், சூரிய ஒளியை சேமித்து வைத்துக் கொண்டு, இரவு நேரத்திலும் பறக்கும் திறனுடன் இந்த விமானம் வடிவமைக்கப்பட்டது. இதில் நான்கு என்ஜின்கள் உள்ளன.

இந்த விமானத்தின் சோதனை, சுவிட்சர்லாந்தில் நடந்தது. ஆண்ட்ரூ போர்ச்பெர்க், விமானத்தை ஓட்டினார். 26 மணி நேர பயணத்துக்குப் பின், சுவிட்சர்லாந்தின் பெயர்னி விமான நிலையத்தில் இந்த விமானம் வெற்றிகரமாக தரை இறங்கியது. இரவு முழுவதும் வெற்றிகரமாக பறந்து எதிர்பார்ப்பை பூர்த்தி செய்த முதல் பயணம் இது.

ஆண்ட்ரூ கூறியதாவது : சூரிய ஒளி மூலம் இரவு நேரத்திலும் பறந்து இந்த விமானம் சாதனை படைத்துள்ளது. பயணத்தின் போது இந்த விமானம் அதிகபட்சமாக 28 ஆயிரத்து 543 அடி உயரத்தை தொட்டது.

விமானத்தின் இறக்கைகளில் பொருத்தப்பட்டுள்ள சூரிய ஒளி தகடுகள், சேமித்து வைத்திருந்த சூரிய ஒளியை இரவு நேரத்துக்கு வெற்றிகரமாக வழங்கின. 26 மணி நேரம் பறந்தது போக, விமானத்தில் மேலும் மூன்று மணி நேரம் பறப்பதற்கான சூரிய ஒளி சக்தி, தகடுகள் மற்றும் சூரிய ஒளி பட்டரிகளில் இருந்தது குறிப்பிடத்தக்க விஷயம்.

சூரிய ஒளி மூலம் பெறும் சக்தியால் இடைவிடாது மணிக்கணக்காக பறக்கமுடியாது என்ற மாயை இதன் மூலம் உடைத்தெறியப்படுகிறது. இதைவிட அதிநவீன தொழில்நுட்ப வசதிகள் உடைய சூரிய ஒளி விமானத்தை வடிவமைக்கவும் திட்டமிட்டுள்ளோம் என்றார்