பெண்ணை ஆபாச படம் எடுத்து மிரட்டிய டிரைவர் கொலை- கொடைக்கானல் மலையில் பிணம்!

தொழிலதிபரின் மகளை செல்போனில் ஆபாச படம் எடுத்து மிரட்டிய கார் டிரைவர் கடத்திக் கொலை செய்யப்பட்டுள்ளார். அவரது உடல் கொடைக்கானல் மலையில் வீசப்பட்டதாகத் தெரிகிறது.

செங்கல்பட்டு நீதிமன்றத்தில் சரணடைந்த 4 பேர் தந்த தகவலின் அடிப்படையில் இந்த திடுக்கிடும் விவரங்கள் வெளியாகியுள்ளன.

அவரை தொழிலதிபரின் குடும்பமே கூலிப் படையை அனுப்பி கொன்றதாகத் தெரிகிறது.

சென்னை ராஜாஅண்ணாமலைபுரம் கிரீன்வேய்ஸ் ரோடு பகுதியை சேர்ந்த பாபு (25) அதே பகுதியில் வசிக்கும் தொழிலதிபர் கிருஷ்ணமூர்த்தியிடம் கார் டிரைவராகப் பணியாற்றி வந்தார்.

இந் நிலையில் கடந்த 1ம் தேதி முதல் அவர் காணாமல் போனார். இது குறித்து பாபுவின் தந்தை அன்பழகன் கொடுத்த புகாரின்பேரில் அபிராமபுரம் போலீசார் வழக்குப்பதிவு செய்து விசாரணை நடத்தி வந்தனர்.

இதற்கிடையே தாம்பரம் சானிடோரியத்தை சேர்ந்த கண்ணன் (37), பல்லாவரத்தை சேர்ந்த விஜயகுமார் (33), ஜான் (33) மற்றும் வேளச்சேரியை சேர்ந்த செந்தில் (33) ஆகியோர் நேற்று மாலை திடீரென செங்கல்பட்டு நீதிமன்றத்தில் மாஜிஸ்திரேட் எழிலரசி முன் சரணடைந்தனர்.

சென்னையில் காணாமல் போன பாபு வழக்கில் அபிராமபுரம் போலீசார் எங்களை தேடுவதாக அறிந்தோம். இதனால் சரணடைகிறோம் என்று கூறிய இவர்களை மாஜிஸ்திரேட் எழிலரசி, 15 நாட்கள் நீதிமன்ற காவலில் புழல் சிறையில் அடைக்க உத்தரவிட்டார்.

இவர்கள் சரணடைந்த தகவல் அறிந்த அபிராமபுரம் போலீஸ் இன்ஸ்பெக்டர் முருகேசன், நேற்றிரவு துணை கமிஷனர் பெரியய்யா, உதவி கமிஷனர் கண்ணபிரான் ஆகியோருடன் அவசர ஆலோசனை நடத்தினார்.

இதைத் தொடர்ந்து பாபு டிரைவராகப் பணியாற்றிய தொழிலதிபர் கிருஷ்ணமூர்த்தி, அவரது மகள் தீபா, மகன் பிரதீப் மற்றும் வீட்டிலிருந்த சிலரிடம் விசாரணை நடத்தப்பட்டது.

அப்போது போலீசாருக்கு திடுக்கிடும் தகவல்கள் கிடைத்தன.

தீபாவை கார் டிரைவர் பாபு, தனது செல்போனில் ஆபாசமாக படம் எடுத்துள்ளார். அந்தப் படத்தை தீபாவிடம் காட்டி மிரட்டி லட்சக்கணக்கில் பணம் பறித்து வந்துள்ளார். ஒரு கட்டத்தில் இந்த விவரம் தீபாவின் தந்தைக்கும் சகோதரருக்கும் தெரியவந்துள்ளது.

இதையடு்த்து பாபுவை தீர்த்துக் கட்ட (நேற்று நீதிமன்றத்தில் சரணடைந்த) 4 பேர் கொண்ட கூலிப்படையை அனுப்பி, டிரைவர் பாபுவை குரோம்பேட்டையில் வைத்து கொலை செய்துள்ளனர். பின்னர் பாபுவின் பிணத்தை மூட்டையில் கட்டி, காரில் கொடைக்கானலுக்கு கொண்டு சென்று மலையில் இருந்து ஒரு பள்ளத்தாக்கில் வீசியுள்ளனர்.

ஆரம்பகட்ட போலீஸ் விசாரணையில் இந்த தகவல்கள் கிடைத்துள்ளதையடுத்து சரணடைந்த 4 பேரையும் தங்களது காவலில் எடுத்து விசாரிக்க போலீசார் திட்டமிட்டுள்ளனர்.

பாபுவின் பிணத்தை கைப்பற்றும் நடவடிக்கைகளும் தொடங்கப்பட்டுள்ளன.

இந்த விவகாரத்தில் தொழிலதிபரின் மகன் பிரதீப் கைது செய்யப்பட்டுள்ளதாகவும் கூறப்படுகிறது. அவர் தான் தந்தைக்கே தெரியாமல் கூலிப் படையை அனுப்பினார் என்றும் ஒரு தகவல் தெரிவிக்கிறது.

மேலும் சரணடைந்தவர்களில் ஒருவரான கண்ணன் தொழிலதிபர் கிருஷ்ணமூர்த்தியிடம் இன்னொரு டிரைவராக பணியாற்றி வந்ததாகவும் தெரிகிறது.

இந்த வழக்கில் தொடர்ந்து விசாரணை நடக்கிறது. இன்று அல்லது நாளை முழு விவரங்கள் வெளியாகலாம் என்று எதிர்பார்க்கப்படுகிறது.

திருட்டு பயலே படம் போல இருக்கே