மகள்களை களம் இறக்குகிறார் ஜர்தாரி

தனது இருமகள்களையும் அரசியல் களத்தில் இறக்கும் முயற்சியில் பாகிஸ்தான் அதிபர் ஆசிப் அலி ஜர்தாரி ஈடுபட்டுள்ளார்.

இதன் முதற்கட்டமாக தனது வெளிநாட்டுப் பயணத்தின் போது மகள்களையும் உடன் அழைத்துச் சென்று அந்நாட்டு தலைவர்களுடன் அறிமுகப்படுத்தி வைக்கத் தொடங்கியுள்ளார்.

தற்போது ஜர்தாரி சீனாவுக்கு பயணம் மேற்கொண்டுள்ளார். சீன அதிபர் ஹூ ஜிண்டாவோவை வியாழக்கிழமை சந்தித்தபோது, தனது மகள்கள் பக்தாவார் மற்றும் ஆஷிஃபாவை உடன் அழைத்துச் சென்று அவரிடம் அறிமுகப்படுத்தி வைத்தார் ஜர்தாரி.

அவர்கள் பேச்சு நடத்தியபோதும் மகள்கள் உடன் இருந்தனர் என்று தெரிகிறது. தலைவர்கள் பேச்சுக்கு இணையாக, ஜர்தாரியின் மகள்கள் சீன அதிபரைச் சந்தித்த செய்தி சீன மற்றும் பாகிஸ்தான் நாளிதழ்களில் பெரிய அளவில் வெளியிடப்பட்டன.

தனது மகள்களை மக்கள் மத்தியில் பிரபலப்படுத்த ஜர்தாரி மேற்கொள்ளும் முயற்சிகளில் இதுவும் ஒன்று என்று பாகிஸ்தான் அரசியல் நோக்கர்கள் கருதுகின்றனர். தனது மகள்கள் ஹூ ஜிண்டாவோவை சந்திக்க ஆசைப்பட்டதால் அவர்களை அழைத்துச் சென்றேன் என்று சந்திப்புக்குப் பின் செய்தியாளர்களிடம் ஜர்தாரி கூறினார்.

இதற்கு முன்னர் பிரிட்டன் பிரதமராக இருந்த கார்டன் பிரெüனை ஜர்தாரி சந்தித்த போதும் தனது மகள் ஆஷிஃபாவை உடன் அழைத்துச் சென்றார் என்பது குறிப்பிடத்தக்கது.

சீன -பாகிஸ்தான் ஒப்பந்தங்கள்: சீனாவும், பாகிஸ்தானும் மிகவும் நெருங்கிய நட்பு நாடுகளாக உள்ளன. பாகிஸ்தான் சீனாவுக்கு மிக நீண்டகால நண்பன். இதுவரை 5 முறை நீங்கள் சீனா வந்துள்ளீர்கள். இதன் மூலம் இருநாடுகளிடையே உறவு மேலும் வலுவடைந்துள்ளது. பாகிஸ்தானுக்கு பொருளாதாரம், பாதுகாப்பு என அனைத்து முக்கிய விஷயங்களிலும் சீனா உதவும் என்று ஹூ ஜிண்டாவோ, ஜர்தாரியிடம் கூறியுள்ளார். இது தொடர்பாக பல ஒப்பந்தங்களிலும் இரு நாட்டு அதிபர்களும் கையெழுத்திட்டனர். இரு தலைவர்களும் சுமார் ஒன்றரை மணி நேரத்துக்கு மேல் பேச்சு நடத்தினர். அப்போது சீனாவின் வானொலி நிகழ்ச்சிகளை பாகிஸ்தானின் முக்கிய நகரங்களில் ஒலிபரப்ப ஜர்தாரி ஒப்புக் கொண்டார். பாகிஸ்தானுக்கு சீனா அணு உலை தயாரித்து அளிக்கவும், இரு நாடுகளிடையே ரயில் பாதை அமைக்கவும் ஏற்கெனவே இருநாடுகளும் ஒப்புக்கொண்டுள்ளன.

கூட்டு களவாணிங்க