டைஜெஸ்டிவ் என்டோஸ்கோபி வாரம்: 100 ஏழைகளுக்கு இலவச அறுவை சிகிச்சை

by ரபீக் Thu Jul 08, 2010 2:09 pm

டைஜெஸ்டிவ் என்டோஸ்கோபி வாரத்தை முன்னிட்டு சென்னை மெட் இந்தியா மருத்துவமனை சார்பில் 100 ஏழைகளுக்கு இலவச அறுவைச் சிகிச்சை செய்யப்படவுள்ளது.

இது தொடர்பாக மெட் இந்தியா மருத்துவமனையின் நிறுவனத் தலைவர் டாக்டர் டி.எஸ்.சந்திரசேகர் கூறியதாவது:

இந்திய கேஸ்ட்ரோ இண்டஸ்டைனல் சொசைட்டியின் 11-வது ஆண்டு மாநாடு ஜூலை 22-ம் தேதி தொடங்குகிறது. இதையொட்டி சென்னை கிண்டியில் உள்ள லீ ராயல் மெரிடியன் ஹோட்டலில் செரிமான நோய்கள் குறித்த டியூ-2010 என்ற சர்வதேச அளவிலான நேரடி பயிலரங்கு நடைபெறுகிறது. இதை தமிழக ஆளுநர் பர்னாலா ஜூலை 24-ம் தேதி தொடங்கி வைத்து, கேஸ்ட்டரோஎன்டராலஜி பற்றிய நூலையும் வெளியிடுகிறார்.

டைஜெஸ்டிவ் என்டோஸ்கோபி வாரம் 2010 என பெயரிடப்பட்டிருக்கும் இந்த மாநாடு 7 நாட்கள் நடக்கிறது. இதில் பல்வேறு நாடுகளைச் சேர்ந்த மருத்துவ நிபுணர்கள் உரையாற்றுகின்றனர்.

இந் நிகழ்ச்சிக்கு தலைமை வகிக்கும் துணை முதல்வர் மு.க.ஸ்டாலின், செரிமான நோய்களுக்கான மருத்துவ ஆலோசனை பெற இலவச தொலைபேசி சேவையை (எண் 12789) தொடங்கி வைக்கிறார். செரிமான கோளாறுகள், மஞ்சள் காமாலை, ஹெபடைடிஸ் பி, கல்லீரல் நோய்கள், ஜீரண உறுப்புகளில் ஏற்படும் புற்றுநோயால் பாதிக்கப்பட்ட நோயாளிகள் இந்தத் தொலைபேசி சேவையைப் பயன்படுத்தலாம்.

இந்தப் பயிலரங்கை முன்னிட்டு, நுங்கம்பாக்கத்தில் உள்ள மெட் இந்தியா மருத்துவமனையில் நடக்கும் முகாமில் செரிமான கோளாறுகளால் பாதிக்கப்பட்ட 100 ஏழை நோயாளிகளைத் தேர்ந்தெடுத்து இலவச அறுவை சிகிச்சை செய்யப்படவுள்ளது. இந்த முகாம் ஜூலை 11-ம் தேதி காலை 8 மணி முதல் பகல் 1 மணி வரை நடத்தப்படும்.

இந்த இலவச சிகிச்சையைப் பெற விரும்பும் நோயாளிகள் தங்களது பெயர்களை மருத்துவமனையில் ஜூலை 8-ம் தேதி முதல் 10-ம் தேதி வரை பதிவு செய்யலாம். பதிவு செய்வதற்கு தொடர்பு கொள்ள வேண்டிய எண்கள்: 98409 93132, 98409 93135, 044 28311415, 044 28311001 என்றார்.