ஜெர்மனி வீழ்ச்சி: புதிய உலகச் சாம்பியன் தயார்!

by ரபீக் Thu Jul 08, 2010 11:52 am

முதல் முறையாக இறுதிப் போட்டிக்கு வந்திருக்கும் ஸ்பெயின் அணியும், இருமுறை இறுதிப் போட்டிவரை வந்தும் கோப்பையைத் தவறவிட்ட நெதர்லாந்து அணியும் வரும் ஞாயிற்றுக்கிழமை நடக்கும் உலகக் கோப்பை இறுதிப் போட்டியில் மோதவுள்ளன.

டர்பனில் நேற்று நள்ளிரவு நடந்த இரண்டாவது அரையிறுதிப் போட்டியில் நேர்த்தியான ஆட்டத்திறன் கொண்ட ஜெர்மனி அணியும், ஸ்பெயின் அணியும் மோதின. எந்த அணி வெற்றிபெறும் என்று கணிக்க முடியாத அளவுக்கு இரு அணிகளின் திறன் மீது நம்பிக்கை வைக்கப்பட்டிருந்தது.

ஆனால் நேற்றைய ஆட்டம் முழுக்க முழுக்க ஸ்பெயின் வீரர்களின் கட்டுப்பாட்டிலேயே இருந்தது. முதல் பாதி ஆட்டத்தில் பத்துக்கும் அதிகமான கோல் வாய்ப்புகளைத் தவறவிட்ட போதும், ஜெர்மனி வீரர்களுக்கு கோலடிக்க எந்த வாய்ப்பும் தரவில்லை. முற்பாதி ஆட்டம் கோல் எதுவும் போடப்படாமல் நிறைவடைந்த நிலையில், இரண்டாம் பாதி ஆட்டத்திலும் பல கோல் வாய்ப்புகளை ஸ்பெயின் வீரர்கள் தவறவிட்டனர். ஜெர்மனியின் ஆட்டத்தின் 73-வது நிமிடத்தில் பெனால்டி கார்னர் வாய்ப்பு அற்புதமாகப் பயன்படுத்தி, ஸ்பெயின் வீரர் பயோல் தலையால் முட்டி கோலடித்தார்.

இதன் பிறகு ஜெர்மனி வீரர்கள் ஆக்ரோஷமான ஆட்டத்தை வெளிப்படுத்தினார்கள். எனினும் கோலடிக்க வாய்ப்பு எதுவும் கிடைக்கவில்லை. இறுதியில் 1-0 என்ற கோல் கணக்கில் ஸ்பெயின் வெற்றி பெற்று இறுதிப் போட்டிக்கு முன்னேறியது.