இந்திய பொதுவுடைமைக்கட்சி டி. ராஜாவுடன் இலங்கைத் தமிழ் எம்.பி.க்கள் சந்திப்பு

இந்திய கம்யூனிஸ்ட் கட்சியின் தேசிய செயலர் டி. ராஜாவை, இலங்கை தமிழ் எம்.பி.க்கள் நேற்று சந்தித்துப் பேசினர்.
தில்லியிலுள்ள கட்சியின் தலைமை அலுவலகத்தில் புதன்கிழமை இந்த சந்திப்பு நடைபெற்றது. தமிழ் தேசிய ஒருங்கிணைப்பின் எம்.பி.க்கள் சம்பந்தம் சுரேஷ், பிரேமச்சந்திரன், சேனாதிராஜா ஆகியோர் ராஜாவைச் சந்தித்துப் பேசினர்.

அப்போது இலங்கையில் வசிக்கும் தமிழர்களுக்கு ஆதரவாக குரல் எழுப்பவேண்டும் என்று ராஜாவிடம் அவர்கள் கோரிக்கை வைத்தனர். இலங்கையில் ஏற்பட்டுள்ள பிரச்னைக்கு அரசியல் தீர்வு காண இந்திய அரசை கம்யூனிஸ்ட் கட்சி வலியுறுத்தவேண்டும் என்றும் அவர்கள் கேட்டுக் கொண்டனர்.

இலங்கை பிரச்னையை நாடாளுமன்றத்துக்கு உள்ளேயும், வெளியேயும் இந்திய கம்யூனிஸ்ட் கட்சி எழுப்பும் என்று தமிழ் எம்.பி.க்களிடம் ராஜா உறுதி அளித்தார். மேலும் நிவாரண மற்றும் மறுசீரமைப்பு முகாம்களில் தங்கியுள்ள தமிழர்களுக்கு ஏற்பட்டுள்ள இன்னல்கள் குறித்தும் பிரச்னை எழுப்புவதாக ராஜா உறுதி அளித்தார்.

அப்போது ராஜா கூறியதாவது:

தமிழர்களின் நிலை மோசமாகி வருகிறது: கடந்த ஆண்டு நடந்த போரின்போதும், அதன் பின்னரும் இலங்கையில் ஏராளமான தமிழர்கள் கொல்லப்பட்டுள்ளனர். இந்த போர்க்குற்றம் தொடர்பாக விசாரணை நடத்த ஐக்கிய நாடுகள் சபையின் பொதுச் செயலர் பான் கி மூன், நிபுணர் குழுவை ஏற்படுத்தியுள்ளார். ஆனால் நிபுணர் குழுவை அமைத்ததற்கு இலங்கை எதிர்ப்பு தெரிவித்து வருகிறது.

இந்தப் பிரச்னை குறித்து இந்திய அரசு மெüனமாக இருப்பது ஏன் என்று தெரியவில்லை. ஐக்கிய நாடுகள் சபை, அணி சாரா கூட்டமைப்பு நாடுகள் அமைப்பில் இந்த பிரச்னை குறித்து இந்தியா பேசவேண்டும்.

மேலும் தமிழர்கள் அதிகமுள்ள பகுதிகளில் ராணுவ முகாம்களை அமைக்கும் இலங்கை அரசின் செயல் கவலை அளிக்கிறது. முள்வேலி முகாம்களில் அடிப்படை வசதிகள் ஏதும் இல்லாமல் தமிழர்கள் தங்கவைக்கப்பட்டுள்ளனர். நாளுக்கு நாள் அங்கு தமிழர்களின் நிலைமை மோசமாகி வருகிறது என்றார் அவர்.