கொழும்பில் ஐ.நா. அலுவலகம் முற்றுகை

கொழும்பில் உள்ள ஐ.நா. அலுவலகத்தை ஆளும் கூட்டணி கட்சியினர் செவ்வாய்க்கிழமை முற்றுகையிட்டு ஆர்ப்பாட்டம் நடத்தினர்.

இலங்கை வீட்டுவசதி வாரிய அமைச்சர் விமல் வீரவன்ஷா தலைமையில் நடைபெற்ற இந்த ஆர்ப்பாட்டத்தில் நூற்றுக்கணக்கானோர் பங்கேற்றனர்.

இலங்கையில் இறுதிகட்ட போரின்போது மனித உரிமைகள் மீறப்பட்டதாக எழுந்துள்ள புகார்கள் குறித்து விசாரிக்க மூன்று நபர் குழுவை ஐ.நா. சபை நியமித்துள்ளது.

இதனை எதிர்த்து ஆளும் ஐக்கிய மக்கள் கூட்டணியைச் சேர்ந்த தேசிய சுதந்திர முன்னணி கட்சியினர் ஐ.நா. அலுவலகம் முன் ஆர்ப்பாட்டத்தில் ஈடுபட்டனர்.

இது குறித்து அமைச்சர் விமல் வீரவன்ஷா கூறியதாவது:

சர்வதேச போர் தீர்ப்பாயத்தின் விசாரணைக்கு உள்படுத்த முன்னோட்டமாக 3 நபர் குழுவை ஐ.நா. நியமித்துள்ளது.

வடக்கு, கிழக்குப் பிராந்தியத்தில் விடுதலைப் புலிகளிடம் சிக்கியிருந்த தமிழர்களை மீட்க அதிபர் ராஜபட்சவின் வழிகாட்டுதலில் போர் நடைபெற்றது. இந்தப் போரில் மனித உரிமைகள் மீறப்படவில்லை.

தற்போது, போர் குறித்து விசாரணை நடத்தி விடுதலைப் புலிகளுக்கு ஆதரவான அறிக்கையை அளிக்க ஐ.நா. குழு திட்டமிட்டுள்ளது. இதை வன்மையாகக் கண்டிக்கிறோம் என்றார்.

இந்த விவகாரம் தொடர்பாக இலங்கை நாடாளுமன்றத்தில் திங்கள்கிழமை பேசிய ராணுவ முன்னாள் தளபதியும், எதிர்க்கட்சி எம்.பி.யுமான சரத் பொன்சேகா, ஐ.நா. குழுவின் விசாரணையை இலங்கை அரசு தைரியமாக எதிர்கொள்ள வேண்டும், மனித உரிமைகள் மீறப்படவில்லை என்பதற்கான ஆதாரங்களை அளிக்க வேண்டும் என்றார்.

அவர் மேலும் கூறும்போது, விடுதலைப் புலிகளுக்கு எதிரான போரில் மனித உரிமைகள் மீறப்படவில்லை.

சர்வதேச விதிகளுக்கு உள்பட்டே போர் நடைபெற்றது. இந்தப் பிரச்னையில் ராணுவத் தரப்புக்கு எனது முழு ஆதரவு உண்டு என்றார்.

இதனிடையே, ஆயுதபேர ஊழல் வழக்கில் தொடர்புடைய சரத் பொன்சேகாவின் மருமகன் தனுனா திலகரத்னே தலைமறைவாக இருப்பது குறித்து நாடாளுமன்றத்தில் ஆளும் கட்சி எம்.பி.க்கள் கேள்வி எழுப்பினர்.

இதற்குப் பதிலளித்த பொன்சேகா, பிடிவாரண்ட் பிறப்பிக்கப்பட்டுள்ள தனுனா திலகரத்னே நீதிமன்றத்தில் சரணடைய வேண்டும் என்பதே எனது கருத்து, இந்த வழக்கில் அவரது குடும்பத்தினரை போலீஸôர் துன்புறுத்துவதை நிறுத்திக் கொள்ள வேண்டும் என்றார்.