29 வயதுக்கு முன் மணமுடிக்க யோசனை: ஜோதிடர் சொன்னதால் டோனிக்கு அவசர திருமணம்

by ரபீக் Tue Jul 06, 2010 1:19 pm

இந்திய கிரிக்கெட் அணி கேப்டன் டோனி- சாக்ஷி திருமணம் நேற்று முன்தினம் இரவு டேராடூனில் நடந்தது. இவர்கள் இருவருக்கும் கடந்த சனிக்கிழமைதான் திருமண நிச்சயதார்த்தம் நடந்தது. மறுநாளே அவசர அவசரமாக திருமணத்தை நடத்தி முடித்துவிட்டனர்.

மனைவி ஷாக்ஷி டோனியின் பள்ளித்தோழி ஆவார். அவர்கள் இருவரும் காதலித்து வந்த விஷயம் கூட நிச்சயதார்த்தம் முடிந்த பிறகுதான் வெளியே தெரிந்தது.

ஏன் டோனி இவ்வளவு அவசரமாக திருமணம் செய்து கொண்டார்? என்பது பெரும் கேள்விக்குறியாகவே இருக்கிறது.

சமீப காலமாக டோனி பற்றி பல்வேறு செய்திகள் வரத்தொடங்கின. அவர் நடிகைகள் அசின், தீபிகா படுகோனே ஆகியோரை காதலிப்பதாகவும், இவர்களில் ஒருவரை அவர் திருமணம் செய்து கொள்ள போகிறார் என்றும் கிசு கிசு பரவியது.

இந்த கிசுகிசுவை அடுத்தே அவருக்கு அவசர திருமணம் செய்து வைக்கப்பட்டதாக ஒரு தகவல் கூறியது.

ஆனால் ஜோதிடர் கூறிய ஒரு தகவலால்தான் அவருக்கு உடனடி திருமணம் நடந்ததாக டோனியின் நெருங்கிய வட்டார தங்கள் கூறுகின்றன.

டோனிக்கு நாளை (7-ந்தேதி) பிறந்தநாள். அப்போது 29 வயது பிறக்கிறது. அதற்கு முன்பே திருமணம் நடந்தால் சிறப்பாக இருக்கும் என்று ஜோதிடர் கூறினாராம். எனவேதான் 29 வயது பிறப்பதற்கு முன்பே நேற்று முன்தினம் திருமணத்தை முடித்துவிட்டனர் என்று டோனிக்கு நெருக்கமானவர்கள் தெரிவித்தனர்.

முதலில் இருவருக்கும் அக்டோபர் மாதம்தான் திருமணம் நடத்த வேண்டும் என்று நிச்சயதார்த்தம் செய்துள்ளனர். ஜோதிடர் கூறியதால் அவசரமாக மறுநாளே திருமணத்தை முடித்து வைத்துவிட்டனர்.