பாகிஸ்தான் அரசாங்கம் தலிபான்களுடன் பேச வேண்டும்

தீவிரவாதத்துக்கு முடிவு கட்டுவதற்காக தலீபான்களுடன் பாகிஸ்தான் அரசு அமைதி பேச்சுவார்த்தை நடத்த வேண்டும் என்று முன்னாள் பிரதமர் நவாஸ் ஷெரிப் வலியுறுத்தினார்.

பாகிஸ்தானில் லாகூர் நகரில் உள்ள தத்தா தர்பார் என்ற சூபி வழிபாட்டு தலத்தில் தலிபான்கள் தற்கொலை தாக்குதல் நடத்தியதின் 45 பேர் பலி யானார்கள்.

200 பேர் காயம் அடைந்தனர். இதை தொடர்ந்து தலீபான் தீவிரவாதிகளை அந்த மாநிலத்தில் ஒடுக்க நடவடிக்கை எடுக்க வேண்டும் என்று அந்த மாநிலத்தில் ஆட்சி செய்து வரும் முஸ்லிம் லீக் கட்சி மீதும், அரசாங்கம் மீதும் பல்வேறு தரப்புகள் அழுத்தம் கொடுத்து வருகின்றன.

எதிர்க்கட்சி தலைவரும், முன்னாள் பிரதமரும், பாகிஸ்தான் முஸ்லிம் லீக் கட்சி தலைவருமான நவாஸ் ஷெரீப்புக்கு தலிபான்களிடம் அனுதாபம் அதிகம். அவர்களை ஒடுக்குவதில் மென்மையான அணுகுமுறையை கையாளவேண்டும் என்று கருதுபவர்.

எனவே அவர்களை காப்பாற்ற வேண்டும் என்ற எண்ணத்துடன் அவர் தலீபான்களுடன் பேச்சுவார்த்தை நடத்த வேண்டும் என்று வலியுறுத்தி இருக் கிறார்.

அவர் நிருபர்களிடம் கூறியதாவது,

தீவிரவாதத்துக்கு முடிவு கட்டுவதற்காக, தலீபான்களிடம் பாகிஸ்தான் அராசங்கம் அமைதி பேச்சுவார்த்தை நடத்த வேண்டும். தலீபான்களுடன் பேச்சுவார்த்தை நடத்த தயாராக இருப்பதாக அமெரிக்காவே கூறும்போது, இது போன்ற ஒரு முயற்சியை பாகிஸ்தான் முன் எடுக்க வேண்டும்.

நம் தலைவிதியை நிர்ணயிக்க மேற்கத்திய நாடுகள் என்ன நடவடிக்கை எடுக்கப் போகிறது என்று காத்திருப்பதை விட, நாமே நம் தலைவிதியை நிர்ணயிக்க வேண்டும்.

ஏன் காத்து இருக்க வேண்டும்?

தீவிரவாத பிரச்சினை நம் நாட்டில் தான் இருக்கிறது. இதற்கு நாம் தான் முடிவு எடுக்க வேண்டும். எனவே நாம் தான் நடவடிக்கை எடுக்க வேண்டும் என்றார்.