நக்சலைட்டுகள் கொலை பட்டியலில் 150 அரசியல் தலைவர்கள்

மாவோயிஸ்ட் நக்சலைட்டு இயக்கத்தின் ஒரு பிரிவினர் ஊழல் புகாரில் சிக்கிய தலைவர்களை சுட்டுக்கொல்வோம் என்று பகிரங்க மிரட்டல் விடுத்துள்ளனர். இதனால் அந்த நக்சலைட்டுகளை ஒழிக்கும்படி கட்சி தலைவர்கள் கோரிக்கை விடுத்தனர்.
இதையடுத்து நடந்த வேட்டையில் முக்கிய நக்சலைட் தலைவர் ஆசாத்தை போலீசார் என்கவுண்டரில் சுட்டுக்கொன்றனர். அவரது கூட்டாளிகளைப் பிடிக்கவும் வலைவிரிக்கப்பட்டுள்ளது.

இந்நிலையில் ஆசாத் கொல்லப்பட்டதற்கு பழி தீர்க்க நக்சலைட்டுகள் அதிரடி திட்டம் வகுத்துள்ளனர். நக்சலைட்டுகளின் இன்னொரு முக்கிய தலைவர் கிஷன்ஜி, ஊழல் புகாரில் சிக்கிய 150 அரசியல் தலைவர்களின் கொலை பட்டியல் ஒன்றை வெளியிட்டுள்ளார். இதில் எந்தெந்த தலைவர்களின் பெயர்கள் இடம் பெற்றுள்ளது என்பதை உளவுத்துறை வெளியிட மறுத்துவிட்டது.

நக்சலைட்டுகளின் கொலைப்பட்டியலில் உள்ள தலைவர்களுக்கு பலத்த பாதுகாப்பு அளிக்கப்பட்டுள்ளது. அவர்கள் பொது நிகழ்ச்சிகளில் பங்கேற்க தடை விதிக்கப்பட்டுள்ளது.

இதே போல் ஊழல் புகாரில் சிக்கிய முக்கிய அரசு அதிகாரிகளையும் கொல்ல நக்சலைட்டுகள் திட்டமிட்டுள்ளதாக உளவுத்துறை எச்சரித்துள்ளது. இதனால் தாசில்தார் அலுவலகங்கள், வட்டார போக்குவரத்து அலுவலகங்கள் (ஆர்.டி.ஓ.), சார்பதிவாளர் அலுவலகங்கள், நகராட்சி அலுவலகங்கள் போன்ற அலுவலகங்களுக்கும் பாதுகாப்பு போடப்பட்டுள்ளது.

ஆந்திர தலைமை செயலகத்திற்கு 3 அடுக்கு பாதுகாப்பு அளிக்கப்பட்டுள்ளது. அங்கு ரகசிய கேமராக்களும் பொருத்தப்பட்டுள்ளது. தலைமை செயலகத்திற்கு வரும் பொதுமக்கள் தீவிர சோதனைக்கு பிறகே உள்ளே அனுமதிக்கப்படுகிறார்கள்.

ஐதராபாத்தில் நக்சலைட்டுகளின் நடமாட்டம் இருப்பதால் முக்கிய கட்சி தலைவர்கள் வீட்டிலேயே முடங்கி உள்ளனர். இதுபற்றி அவர்கள் கூறும்போது, இந்த நக்சலைட்டுகளால் எங்களைப் போன்ற தலைவர்களால் வீட்டை விட்டு வெளியில் செல்ல முடியவில்லை. இதே நிலை நீடித்தால் பொதுவாழ்க்கைக்கு வர எல்லோருமே பயப்படுவார்கள்.

சமூக சேவை செய்பவர்கள்தான் அரசியலுக்கு வரவேண்டும் என்று நக்சலைட்டுகள் விரும்புகிறார்கள். நாங்களும் சேவை உள்ளத்துடன்தான் செயல்பட்டு வருகிறோம்.

அரசியலில் வெற்றி பெற பணம் தேவைப்படுகிறது. இது நக்சலைட் தலைவர்களுக்கு தெரியாதா? நக்சலைட் இயக்கம் வளர்வது அரசியல் தலைவர்களுக்கு நல்லதல்ல. எனவே இப்போதே போலீசார் நக்சலைட்டுகளை களை எடுக்க வேண்டும் என்றார்