ஹெலிகாப்டர் பயணம் நூலிழையில் தப்பினார் நிதீஷ் குமார்

பிகார் முதல்வர் நிதீஷ்குமார் மற்றும் ஐக்கிய ஜனதா தள தலைவர்கள் 2 பேர் பயணம் செய்த ஹெலிகாப்டர், கதவு மூடப்படாமல் மேலெழும்பியது கடைசி நேரத்தில் கண்டுபிடிக்கப்பட்டது. இதனால், நிதீஷ்குமாரும், அவரது கட்சித் தலைவர்களும் அதிருஷ்டவசமாக உயிர் தப்பினர்.

அண்மையில் மறைந்த மத்திய முன்னாள் அமைச்சர் திக்விஜய் சிங் குடும்பத்தினருக்கு ஆறுதல் கூறுவதற்காக முதல்வர் நிதீஷ்குமார், மாநில உணவுத் துறை அமைச்சர் நரேந்திர சிங், கட்சியின் செய்தித் தொடர்பாளர் சிவானந்த் திவாரி ஆகியோர் கித்ஹாருக்கு சனிக்கிழமை சென்றனர். அங்கிருந்து ஹெலிகாப்டர் மேலெழும்பியபோது, அதன் இடதுபக்க கதவு மூடாமல் இருந்ததை விமானிகள் ராமன், ரவி ஆகியோர் கண்டுபிடித்தனர்.

உடனடியாக ஹெலிகாப்டர் தரை இறக்கப்பட்டு, கதவில் ஏற்பட்டிருந்த தொழில்நுட்பக் கோளாறு சரி செய்யப்பட்டது. அதன் பின்னர் அங்கிருந்து ஹெலிகாப்டர் புறப்பட்டுச் சென்றது.இது குறித்து உள்ளூர் போலீஸ் தரப்பில் உயர் நிலை விசாரணை நடத்தப்படுகிறது.அதேபோல், விமான போக்குவரத்து துறை சார்பில் கூடுதல் தலைமை விமானி தீபக் குமார் சிங் தலைமையில் விசாரணை நடத்தப்படுகிறது. ஆந்திர மாநில முன்னாள் முதல்வர் ராஜசேகர ரெட்டி பயணம் செய்த ஹெலிகாப்டர், தொழில்நுட்பக் கோளாறு காரணமாக விபத்துக்குள்ளானதில் கடந்த செப்டம்பர் 2-ம் தேதி அவர் உயிரிழந்தது குறிப்பிடத்தக்கது.