தமிழக சட்டப் பேரவை தேர்தல்: தேர்தல் அதிகாரிகள், போலீஸôருடன் நவீன் சாவ்லா 6-ல் ஆய்வு- நரேஷ் குப்தா தகவல்

தமிழக சட்டப் பேரவை தேர்தல் தொடர்பாக மாவட்ட தேர்தல் அதிகாரிகள் மற்றும் மூத்த காவல்துறை அதிகாரிகளுடன் தலைமைத் தேர்தல் ஆணையர் நவீன் சாவ்லா, சென்னையில் ஜூலை 6-ம் தேதி ஆய்வு நடத்துகிறார்.

இதுகுறித்து தமிழக தலைமை தேர்தல் அதிகாரி நரேஷ் குப்தா, சனிக்கிழமை செய்தியாளர்களிடம் கூறியது:

சென்னை லலித்கலா அகாதெமியில் ஜூலை 6-ம் தேதி காலை 9.30 மணிக்கு புகைப்பட கண்காட்சியை தலைமைத் தேர்தல் ஆணையர் நவீன் சாவ்லா தொடங்கி வைக்கிறார்.

இந்தக் கண்காட்சியில் தேர்தல் ஆணையர்கள் எஸ்.ஓய்.குரோஷி, வி.எஸ்.சம்பத் ஆகியோர் பங்கேற்கின்றனர். கண்காட்சியைப் பொதுமக்களும் இலவசமாகப் பார்க்கலாம். ஜூலை 6-ம் தேதியன்று காலை 11 மணி முதல் மாலை 5 மணி வரையிலும், ஜூலை 7-ம் தேதி முதல் ஜூலை 11-ம் தேதி வரை (காலை 10 மணி முதல் மாலை 5 மணி வரை) கண்காட்சி நடைபெறும்.

மிகப்பெரிய ஜனநாயக நாடான இந்தியாவில் நடத்தப்படும் தேர்தல்கள் குறித்து ஆவணப் படமும் திரையிடப்படும். 20 நிமிடங்கள் ஓடக்கூடிய இந்த ஆவணப்படம் ஆங்கிலம், தமிழ் ஆகிய இரு மொழிகளில் திரையிடப்படும்.

மாவட்ட தேர்தல் அதிகாரிகளுடன் ஆய்வுக் கூட்டம்:

புகைப்பட கண்காட்சி தொடக்க விழா நிகழ்ச்சியைத் தொடர்ந்து மாவட்ட தேர்தல் அதிகாரிகள், மூத்த காவல்துறை அதிகாரிகளுடன் தலைமைத் தேர்தல் ஆணையர் நவீன் சாவ்லா ஆய்வு நடத்துகிறார். வாக்காளர் பட்டியல், வாக்குச்சாவடி மையங்கள் மறுஆய்வு என தேர்தல் தொடர்பான பல்வேறு அம்சங்கள் குறித்து விவாதிக்கப்படும்.

இறுதி வாக்காளர் பட்டியல்:

தமிழக வரைவு வாக்காளர் பட்டியல் ஜூலை 1-ம் தேதி வெளியிடப்பட்டுள்ளது. இதில் ஆட்சேபம் இருப்பதாக கருதும் வாக்காளர்கள் ஜூலை 16-ம் தேதிக்குள் தங்களது கருத்துக்களை தெரிவிக்கலாம். அதைத்தொடர்ந்து, இறுதி வாக்காளர் பட்டியல் செப்டம்பர் 15-ம் தேதி வெளியிடப்படும்.

மேலவைத் தேர்தல் - நவம்பரில் வாக்காளர் பட்டியல்:

நவம்பர் 1-ம் தேதி தகுதி ஏற்படுத்தும் நாளாகக் கொண்டு, மேலவைக்கான வாக்காளர் பட்டியல் தயாரிக்கப்பட்டு வருகிறது. இந்த பட்டியல் நவம்பர் 2-வது அல்லது 3-வது வாரத்தில் வெளியிடப்படும். தேர்தல் தொடர்பான அறிவிப்பை தலைமைத் தேர்தல் ஆணையம் வெளியிடும். சட்டப் பேரவை தேர்தலுக்கு ஓராண்டுக்கும் குறைவான காலமே இருப்பதால், பூந்தமல்லி தொகுதிக்கு இடைத்தேர்தல் நடத்த வேண்டியதில்லை என்றார் நரேஷ் குப்தா.