ஜின்னாவை அவமதித்ததாக பாக். அதிபர் சர்தாரி மீது புகார்

பாகிஸ்தானில் ஆளும் கட்சியான பாகிஸ்தான் மக்கள் கட்சியின் எம்.பி.க்கள் மற்றும் எம்.எல்.ஏ.க்கள் பலர் தாங்கள் பட்டதாரிகள் என பொய் தகவல்களை கூறி தேர்தலில் போட்டியிட்டு வெற்றி பெற்றுள்ளதாக புகார் கூறப்பட்டுள்ளது. இது அங்கு பெரும் பிரச்சினையை ஏற்படுத்தியுள்ளது.

இந்த நிலையில் அதிபர் ஆசிப் அலி சர்தாரி பாகிஸ்தான் டெலிவிஷனுக்கு ஒரு பேட்டி அளித்தார். அதில், தேச தந்தை முகமது அலி ஜின்னா கூட பட்டதாரி அல்ல என்று கூறியிருந்தார்.

இதை அரசுக்கு சொந்தமான பாகிஸ்தான் டி.வி. அந்த வார்த்தையை மட்டும் சென்சார் செய்து விட்டு அவரது பேட்டியை ஒளிபரப்பியது. ஆனால் தனியார் டி.வி. பேட்டியை அப்படியே ஒளிபரப்பியது.

இது பாகிஸ்தான் அரசியல் கட்சிகளிடையே பெரும் சர்ச்சையையும் பிரச்சினையையும் ஏற்படுத்தியுள்ளது. சர்தாரியின் ஜின்னா குறித்த பேச்சை கண்டித்து பாராளுமன்றத்தில் கண்டன தீர்மானம் கொண்டு வர எதிர்க்கட்சிகள் முடிவு செய்துள்ளன.

இது போன்ற பேட்டியின் மூலம் ஜின்னாவை அதிபர் சர்தாரி அவமதித்து விட்டார். நாட்டு மக்களை தவறாக வழி நடத்துகிறார். எனவே அவர் மக்களிடம் மன்னிப்பு கேட்க வேண்டும் என பிரதான எதிர்க்கட்சியான பாகிஸ்தான் முஸ்லிம் லீக் (நவாஸ்) கட்சியின் தலைவர் பெர்வேஷ் ரஷீத் தெரிவித்துள்ளார்.

ஜின்னாவை தரக்குறைவாக பேசி தனது கட்சியின் படிக்காத எம்.பி., எம்.எல்.ஏ.க்களை காப்பாற்ற சர்தாரி முயற்சிக்கிறார் என பாகிஸ்தான் முஸ்லிம் லீக் கட்சியின் எம்.பி. ஆசியா அசிம் குற்றம் சாட்டியுள்ளார்.

ஆனால் இந்த புகாரை அதிபர் சர்தாரி தரப்பினர் மறுத்துள்ளனர். தனது பேட்டியில் ஜின்னாவின் கல்வித் தகுதி குறித்து சர்தாரி எதுவும் தெரிவிக்கவில்லை என்று அவரது நெருங்கிய நண்பர் பைசல்ரசா அபிதி தெரிவித்துள்ளார்.