5-ந்தேதி பந்த்: தேர்தலை மனதில் வைத்து முழு அடைப்பு நடத்துகிறார்கள்; திருமாவளவன் குற்றச்சாட்டு

by arularjuna Fri Jul 02, 2010 3:36 pm

பழைய மாமல்லபுரம் சாலையில் உள்ள செம்மஞ்சேரி பகுதியில் காஞ்சிபுரம் மாவட்ட விடுதலை சிறுத்தைக் கட்சியின் மாவட்ட அலுவலகம் திறப்பு விழா நடைபெற்றது. காஞ்சிபுரம் மாவட்ட செயலாளர் சூ.க. விடுதலை செழியன் தலைமை தாங்கினார். இளையவளவன், தென் னவன், சிறுத்தை கிட்டு, கலை வடிவன், எழிலரசு, வெற்றி செல்வன, பூவழி ஆகியோர் முன்னிலை வகித்தனர்.

சிறப்பு அழைப்பாளராக விடுதலைச் சிறுத்தை கட்சியின் தலைவர் திருமாவளவன் எம்.பி கலந்து கொண்டு மாவட்ட கட்சி அலுவலகத்தை ரிப்பன் வெட்டி திறந்து வைத்தார். அப்போது பல்வேறு கட்சியை சேர்ந்த
200-க்கும் மேற்பட்டவர்கள் திருமாவளவன் முன்னிலையில் விடுதலைச் சிறுத்தை கட்சியில் இணைந்தனர்.

பின்னர் திருமாவளவன் நிருபர்களிடம் கூறியதாவது:-

சாதிவாரி கணக்கெடுப்பு என்பது மிக மிக முக்கியம் ஆகும். இதனை விடுதலைச்சிறுத்தை கட்சி வரவேற்கிறது. அப்போது தான் மக்கள் தொகை அடிப்படையில் அவர் அவருக்கு சமூக நீதி கிடைக்கும்.

ஒவ்வொரு முறையும் பெட்ரோல் விலை உயரும் போது மத்திய அரசு சர்வதேச சந்தையில் கச்சா எண்ணையின் விலை உயர்வு காரணமாக தான் விலை உயர்வு ஏற்படுகிறது என்று கூறி வருகிறது. இதனை சமாளித்து சாதாரண மக்கள் வாங்கும் சக்தியை கொண்டு வந்து விலைவாசி கட்டுபடுத்துவது அரசின் கடமையாகும்,

உடனடியாக பெட்ரோல், டீசல், மண்எண்ணை, சமையல் எரிவாயு ஆகியவற்றின் விலை உயர்வை மத்திய அரசு உடனடியாக திருப்பபெற வேண்டும், வருகிற 5-ந்தேதி பா.ஜ.க உள்ளிட்ட எதிர் கட்சிகள் எதிர் வரும் தேர்தலை கணக்கில் கொண்டு தான் முழு அடைப்பு போராட்டத்தை நடத்துகிறது. இதற்கு முன்பு விலைவாசி உயர்வு ஏற்பட்டது கிடையாதா?

செம்மொழி மாநாட்டில் எங்கள் கட்சியின் சார்பில் வைத்த இரண்டு கோரிக்கைகள் முதல் இரண்டு தீர்மானங்களாக நிறை வேற்றபட்டுள்ளது.

தமிழை இந்தியாவில் ஆட்சி மொழியாக்க வேண்டும், தமிழ் ஈழத்தில் தமிழர்களுக்கு ஆட்சியில் அதிகார பகிர்வு வேண்டும். இதற்கு ஒப்புதல் அளிக்கும் வகையில் செம்மொழி மாநாட்டில் முதல்வர் பேச்சு அமைந்தது. இது தொடர்பாக முதல்-அமைச்சர் எடுக்கும் அனைத்து முயற்சிகளுக்கும் விடுதலைச் சிறுத்தைக் கட்சி உறுதுணையாக இருக்கும்.

வருகிற 7-ந்தேதி காஞ்சி புரம் மாவட்டத்தில் உள்ள கோழியாளத்தில் ரெட்டை மலை சீனிவாசன் பிறந்த நாளை முன்னிட்டு அவருக்கு நினைவு மணிமண்டபம் திறப்பு விழா நடைபெறுகிறது. இதில் நான் கலந்து கொண்டு மணி மண்டபத்தை திறந்து வைக்க உள்ளேன்.

இவ்வாறு திருமாவளவன் கூறினார்.

முன்னதாக முகமது அனிபா வரவேற்று பேசினார். மாநில செயற்குழு உறுப்பினர் ஏகாட்டூர் அஜய் சி. மோகன்குமார் நன்றி கூறினார்.