படிக்க உதவி செய்தவரின் மனைவியுடன் கள்ளத்தொடர்பு வைத்திருந்தவர் கொலை

arularjuna · arularjuna Fri 2 Jul 2010 - 11:42

கடலூர்:மனைவியுடன் கள்ளத்தொடர்பு வைத்திருந்த வாலிபரை, கத்தியால் குத்திக்கொலை செய்த கணவர், போலீஸ் ஸ்டேஷனில் சரணடைந்தார்.கடலூர் முதுநகர் அடுத்த பச்சையாங்குப்பம் ஹவுசிங் போர்டு திலக் நகரைச் சேர்ந்தவர் ஆறுமுகம்(36). கூலி தொழிலாளி. இவரது மனைவி சுமதி(30). இவர்களுக்கு ஒரு மகன், 2 மகள்கள் உள்ளனர். அதே பகுதியைச் சேர்ந்தவர் சம்பந்தம் மகன் பிரபு(23). இவரது தந்தை இறந்துவிட்டதால். தாய் மற்றும் தங்கை ரேவதியுடன் வசித்து வந்தார். ஏழ்மையில் இருந்த பிரபு படிப்பதற்கு ஆறுமுகம் உதவி செய்து வந்தார்.

இந்நிலையில், பிரபுவிற்கு சுமதியுடன் கள்ளத்தொடர்பு ஏற்பட்டது. மனைவியை ஆறுமுகம் கண்டித்தார். இருவருக்கும் தகராறு ஏற்பட்டு, சுமதி தாய் வீட்டிற்கு சென்றுவிட்டார்.இதனையடுத்து, ஆறுமுகம் தீர்த்தனா என்ற பெண்ணை இரண்டாவதாக திருமணம் செய்து கொண்டார். முதல் மனைவி சுமதியிடம் கள்ளத்தொடர்பு வைத்து, குடும்பத்தை கெடுத்த பிரபு மீது ஆறுமுகம் தீராத ஆத்திரத்தில் இருந்தார். நேற்று மதியம் 1.30 மணியளவில், பிரபு தற்போது குடியிருந்து வரும் ஏணிக்காரன் தோட்டம், புது சுனாமி குடியிருப்புக்கு ஆறுமுகம் சென்றார். உன்னால் தான் என் குடும்பம் குலைந்துவிட்டது என்று பிரபுவிடம் கூறியபோது தகராறு ஏற்பட்டது.

ஆத்திரமடைந்த ஆறுமுகம் கையில் வைத்திருந்த கத்தியால், பிரபுவின் நெஞ்சு மற்றும் கழுத்தில் சரமாரியாக குத்தி கொலை செய்தார். தடுக்க வந்த பிரபுவின் தங்கை ரேவதியை(16) கீழே தள்ளினார். ரேவதி சத்தம் போட்டதால், அப்பகுதியில் இருந்தவர்கள் ஓடி வந்தனர். அதனை பார்த்த ஆறுமுகம் மொபட்டில் தப்பிச்சென்று, கடலூர் முதுநகர் போலீஸ் ஸ்டேஷனில் சரணடைந்தார். படுகாயமடைந்த ரேவதி கடலூர் அரசு மருத்துவமனையில் சேர்க்கப்பட்டார்.தகவல் அறிந்த டி.எஸ்.பி., மகேஸ்வரன், இன்ஸ்பெக்டர் (பொறுப்பு) அந்தோணிராஜ் மற்றும் போலீசார், ஆறுமுகத்திடம் விசாரணை செய்து வருகின்றனர்.