உயர்நீதிமன்றத்தில் தமிழில் வாதாட ஜனாதிபதியிடம் சட்ட அனுமதி பெற தி.மு.க. அரசு தவறி விட்டது; மதுரை பொதுக்கூட்டத்தில் வைகோ பேச்சு

தமிழை உயர்நீதிமன்றங்களில் வழக்கு மொழியாக அறிவிக்காத மத்திய-மாநில அரசுகளை கண்டித்து மக்கள் உரிமை கூட்டமைப்பு சார்பில் மதுரையில் பொதுக்கூட்டம் நடந்தது.

கூட்டத்திற்கு மதுரை மாவட்ட வக்கீல்கள் சங்க செயலாளர் ஏ.கே.ராமசாமி தலைமை தாங்கினார். ம.தி.மு.க. நகர் மாவட்ட செயலாளர் புதூர் பூமிநாதன், தமிழ் தேசிய இயக்க நகர தலைவர் பிச்சை கணபதி, இந்திய கம்யூனிஸ்டு மாவட்ட செயலாளர் சரவணன் ஆகியோர் முன்னிலை வகித்தனர்.

கூட்டத்தில் ம.தி.மு.க. பொதுச்செயலாளர் வைகோ, தமிழர் தேசிய இயக்க தலைவர் பழ.நெடுமாறன், ம.நடராஜன் ஆகியோர் சிறப்புரையாற்றினர்.

கூட்டத்தில் வைகோ பேசியதாவது:-

இந்தி எதிர்ப்பு போராட்டம் மதுரையில் நடந்தபோது போராட்டத்தில் ஈடுபட்ட மாணவர்கள் தாக்கப்பட்டனர். அதன் விளைவாக இன்று வரை காங்கிரஸ் கட்சி தமிழகத்தில் ஆட்சிக்கு வரமுடியவில்லை.

இப்போது தமிழுக்காக போராடும் வக்கீல்கள் தாக்கப்படுகிறார்கள். சென்னை ஐகோர்ட்டிலும் வக்கீல்கள் தாக்கப்பட்டனர். உயர்நீதிமன்றத்தில் தமிழை வழக்கு மொழியாக்க போராடிய வக்கீல்கள் கைது செய்யப்பட்டுள்ளனர். கண்ணகி நீதிக்கேட்ட மதுரையில் தமிழ் மொழிக்காக வக்கீல்கள் போராட்டம் நடத்தி வருகிறார்கள்.

தமிழில் வாதாடலாம் என்று சென்னை உயர்நீதி மன்ற நீதிபதிகள் கூறி உள்ளனர். அது வரவேற்கத்தக்கதுதான். ஆனால் வேறு நீதிபதிகள் வரும்போது சட்டப்படி தமிழில் வாதாட உத்தரவாதம் இல்லை என்று கூறினால் என்ன செய்ய முடியும். எனவே உயர்நீதிமன்றத்தில் தமிழில் வாதாட சட்டபூர்வ அங்கீகாரம் தேவை.

உயர்நீதிமன்றத்தில் தமிழில் வாதாடினால் அந்த வழக்கு உச்சநீதிமன்றத்துக்கு மேல்முறையீடு சென்றால் ஆங்கிலத்தில் மொழி பெயர்க்க சிரமம் வரும் என்று கூறுவது விதண்டா வாதம் ஆகும். இது கண்டிக்கத்தக்கதாகும்.

உயர்நீதிமன்றத்தில் தமிழை வழக்கு மொழியாக்க கோரி தமிழக சட்டசபையில் தீர்மானம் நிறைவேற்றிய பின்னர் மத்திய அரசுக்கு கடிதம் எழுதியதாக முதல்- அமைச்சர் கருணாநிதி கூறி உள்ளார்.

இலங்கை பிரச்சினை உள்பட பல கடிதங்கள் மத்திய அரசுக்கு கருணாநிதி எழுதிய நிலையில் அவை அனைத்தும் கோப்புகளாக மட்டுமே பாதுகாக்கப்பட்டு வருகிறது. எனவே மத்திய அரசுக்கு கருணாநிதி கடிதம் எழுதுவதால் எந்த நடவடிக்கையும் ஏற்பட்டு விடாது. அது நம்ப கூடியதும் இல்லை.

உயர்நீதிமன்றத்தில் தமிழை வழக்காடு மொழியாக மத்திய அரசை அறிவிக்க செய்து அந்த கோப்பை ஜனாதிபதி ஒப்புதலுக்கு அனுப்ப வேண்டும்.

தமிழ் செம்மொழி மாநாட்டுக்கு வந்த ஜனாதிபதியிடம் இதுபோன்ற அறிவிப்பை முதல்-அமைச்சர் கருணாநிதி வெளியிட செய்திருக்க வேண்டும். ஆனால் அவர் அப்படி செய்யவில்லை.

எனவே தமிழ் வழக்கு மொழியாக்கும் முயற்சியில் ஜனாதிபதியின் சட்ட அனு மதியை பெற தி.மு.க. அரசு தவறி விட்டது. எனவே தமிழ்நாட்டில் தமிழுக்காக போராட்டம் நடத்த வேண்டிய நிலை தொடர்ந்துள்ளது. எனவே வக்கீல்களின் போராட் டத்துக்கு தமிழக மக்களின் ஆதரவு தொடர்ந்து இருக்கும்.

இவ்வாறு வைகோ பேசினார்.

பொதுக்கூட்டத்தில் ஐகோர்ட்டில் தமிழை வழக்கு மொழியாக்க உண்ணாவிரதம் இருந்த 6 வக்கீல்கள் கலந்து கொண்டனர். அவர்களுக்கு வீரவாள் பரிசு வழங்கப்பட்டது.

கூட்டத்தில் மக்கள் உரிமை கூட்டமைவப்பு தலைவர் மாணிக்கம், வக்கீல்கள் சங்க நிர்வாகிகள் நெடுஞ்செழியன், சின்னராஜா, வக்கீல்கள் ரஞ்சித்குமார், செந்தில்குமார். குணசேகரன் எம்.எல்.ஏ., மகபூப்ஜான் உள்பட பலர் கலந்து கொண்டனர்.
முடிவில் வக்கீல் மனோகரன் நன்றி கூறினார்.