தேச விரோத சக்திகள் வன்முறையை தூண்டுகின்றன: காஷ்மீர் முதல்வர்

காஷ்மீரின் அமைதியை சீர்குலைக்கும் வகையில் தேச விரோத சக்திகள் வன்முறையை தூண்டிவிடுவதாக முதல்வர் உமர் அப்துல்லா குற்றம் சாட்டியுள்ளார்.
காஷ்மீரில் தலைநகர் ஸ்ரீநகரில் பிரிவினைவாத அமைப்புகள் சார்பில் கடந்த வாரம் நடந்த ஆர்ப்பாட்டத்தில் வன்முறை ஏற்பட்டது.
தெற்கு காஷ்மீரின் அனந்தநாக் மாவட்டத்திலும் நேற்று முன்தினம் வன்முறை வெடித்தது. துப்பாக்கிச் சூட்டில் 3 பேர் பலியாயினர்.

ஸ்ரீநகரில் நேற்று பேட்டியளித்த முதல்வர் உமர் அப்துல்லா கூறியதாவது:

காஷ்மீரின் அமைதியை சீர்குலைக்கும் வகையில் தேச விரோத சக்திகள் வன்முறையைத் தூண்டுகின்றன. சுயநல சக்திகளின் சதியை மக்கள் புரிந்து கொள்ள வேண்டும். மாநிலத்தில் முழு அமைதி திரும்ப மக்கள் ஒத்துழைப்பு அளிக்க வேண்டும். பாதுகாப்பு படையினர், மனித உரிமைகளை மதிப்பார்கள். கண்மூடித்தனமான தாக்குதலில் அவர்கள் ஈடுபட மாட்டார்கள்.

பதற்றம் நிலவும் பகுதிகளில் ஊரடங்கு தீவிரமாக அமல்படுத்தப்படும். சுமூக நிலை விரைவில் திரும்புவதை உறுதிப்படுத்த ஊரடங்கை மக்கள் மதிக்க வேண்டும்.

ஊரடங்கு அமலில் உள்ள பகுதிகளில் பெற்றோர்கள் தங்கள் பிள்ளைகளை வெளியில் செல்ல அனுமதிக்கக் கூடாது. இரண்டு கைகளையும் தட்டினால்தான் ஓசை எழும். துப்பாக்கிச் சூட்டில் சில இளைஞர்கள் இறந்திருப்பது கவலையளிக்கிறது. சகஜ நிலை திரும்ப அரசியல் கட்சிகளும் மக்களும் ஒத்துழைக்க வேண்டும்.

இவ்வாறு உமர் அப்துல்லா கூறினார்.

முன்னதாக, ஆளுநர் என்.என்.வோராவை சந்தித்து சட்டம், ஒழுங்கு நிலவரம் குறித்து ஆலோசனை நடத்தினார்.

கண்ணீர் புகை வீச்சு:

இதனிடையே, ஸ்ரீநகரின் நடிபோரா, பட்மாலூ ஆகிய இடங்களில் நேற்றும் ஆர்ப்பாட்டக்காரர்கள் வன்முறையில் ஈடுபட்டனர். போலீசார் மீது கற்களை வீசினர். கூட்டத்தைக் கலைக்க போலீசார் கண்ணீர் புகை குண்டுகளை வீசினர்.

கலவரம் பாதித்த அனந்தநாக் மாவட்டத்தில் பிஜ்பேரா, மட்டான், டூரு, கோகர்நாக் ஆகிய இடங்களில் நேற்று காலை முதல் காலவரையற்ற ஊரடங்கு பிறப்பிக்கப்பட்டுள்ளது.

ஸ்ரீநகரில் முக்கிய இடங்களில் போலீசாரும் துணை ராணுவப் படையினரும் குவிக்கப்பட்டுள்ளனர். பதற்றம் நிலவினாலும் நிலைமை கட்டுப்பாட்டுக்குள் இருப்பதாக ராணுவ அதிகாரிகள் தெரிவித்தனர்.

காஸ்மீரில் எப்போது தான் அமைதி வரும்....?