திருமணமான மாணவிகள் கல்லூரியை விட்டு நீக்கம்!

by ரபீக் Thu Jul 01, 2010 12:55 pm

கல்லூரியில் படித்துக் கொண்டிருக்கும் போதே திருமணமான மாணவிகளை கல்லூரியை விட்டு கல்லூரி நிர்வாகம் நீக்கியுள்ளது சர்ச்சையை ஏற்படுத்தியுள்ளது.

பரபரப்பையும் சர்ச்சையையும் ஏற்படுத்தியுள்ள இச்சம்பவம் திண்டுக்கல் மாவட்டம் தாமரைப்பாடி பகுதியில் நடந்துள்ளது. தாமரைப்பாடி புனித அந்தோனியார் கலை அறிவியல் கல்லூரியில் B C A படித்து வந்த சூர்யா என்ற மாணவிக்கு சமீபத்தில் திருமணம் நடந்தது.

திருமணம் முடிந்து கல்லூரிக்கு வந்த மாணவி சூர்யா படிப்பைத் தொடர கல்லூரி நிர்வாகம் அனுமதிக்கவில்லை. இதே போன்ற குமுறல்கள் திருமணமான பல மாணவிகளிடம் இருந்து வெளி வந்துள்ளது.

பத்துக்கும் மேற்பட்ட மாணவிகள் இவ்வாறு கல்வியைத் தொடர முடியாத அவல நிலை ஏற்பட்டுள்ளது.
கல்லூரியில் படிப்பை நிறுத்தி கொள்ளுமாறு மிரட்டப்படும் மாணவிகள் தானாகவே படிப்பை நிறுத்திக் கொண்டதாக கல்லூரி நிர்வாகம் எழுதி வாங்குவதாகவும் பாதிக்கப்பட்ட மாணவிகள் தெரிவித்தனர்.

திருமணமான மாணவிகளை படிப்பை பாதியில் நிறுத்துமாறு கட்டாயப் படுத்தக் கூடாது என சென்னை உயர் நீதிமன்றம் சமீபத்தில் உத்தரவிட்டும் அதனை கல்லூரிகள் அலட்சியப் படுத்துவது குறித்து சமூக நல ஆர்வலர்கள் கவலை தெரிவித்துள்ளனர்.