ஓர் பாலின ஈர்ப்பாளர்கள் மெரினாவில் கொண்டாட்டம்

by ரபீக் Thu Jul 01, 2010 12:49 pm

ஓர் பாலின ஈர்ப்பு கொண்டவர்கள், இரு பாலின ஈர்ப்பு கொண்டவர்கள் மற்றும் பாலின மாற்றம் கொண்டவர் இணைந்து, ‘வானவில்’ என்ற பெயரில் மெரினா கடற்கரையில் நேற்று பேரணி நடத்தினர்.
உழைப்பாளர் சிலையில் இருந்து காந்தி சிலை வரை நடைபெற்ற பேரணியில் ஓர் பாலினம், இரு பாலினம் மற்றும் பாலினம் மாற்றம் கொண்ட 500 பேர் கலந்து கொண்டனர். இவர்களின் பேரணியை பார்க்க கடற்கரையில் ஏராளமான பொதுமக்கள் கூடிவிட்டனர்.

பேரணியில் பங்கேற்ற கல்கி என்பவர் கூறியதாவது:

ஆண் & பெண் உறவுகள் என்று ஏற்றுக் கொள்ளப்பட்ட பாலின அடையாளங்களும், எதிர்பார்ப்புகளும் வெளியே நிற்பவை. எங்கள் காதல், அன்பு மற்றும் அடையாளங்கள் இயற்கையானவை. ஆனால், இயற்கைக்கு புறம்பானவை என்றும், வெளிநாட்டு இறக்குமதிகள் என்றும் சமூகம் தூற்றுகிறது. எங்களுடைய மனித உரிமைகளை மறுப்பது அநீதி.

கடந்த ஆண்டு டெல்லி உயர் நீதிமன்றம், ‘வயது வந்த இருவரின் விருப்பத்துடன் நடக்கும் பால் சம்பந்தப்பட்ட உறவு குற்றமல்ல’ என்று தீர்ப்பு வழங்கியுள்ளது. இந்த தீர்ப்பு எங்களது மாற்றுக் காதலை குற்றமற்றது என்று அறிவித்தது. அந்த தீர்ப்பை கொண்டாடுகிறோம். கார்ப்பரேட் நிறுவனங்கள், காவல் துறை, நீதித்துறை, மத அமைப்புகள் மற்றும் பொதுமக்கள் எங்கள் மீது தொடுக்கும் வன்முறை, ஒதுக்குதல் போன்றவற்றுக்கு உடனடியாக தீர்வு காண வேண்டும்.

இவ்வாறு அவர் கூறினார்