நல்ல பாம்பு

குமார் எப்போதும் அவனுடைய வீட்டுத் தோட்டத்திலுள்ள பம்பு செட் அறைக்குள் அமர்ந்து வீட்டுப் பாடங்களைப் படிப்பது வழக்கம்.

ஒருநாள் குமாரின் தந்தை முத்துவேல், பம்பு செட் அறைக்குள் பாம்பு இருப்பதையும், அது கோபத்துடன் படமெடுத்துச் சீறுவதையும் பார்த்து விட்டார். அதை அடிக்க அவர் முயற்சிக்கும்போது அந்தப் பாம்பு தப்பி ஓடிவிட்டது.

அன்று குமார் வழக்கம் போல் புத்தகத்தை எடுத்துக் கொண்டு பம்பு செட் அறைக்கு வந்ததைப் பார்த்த குமாரின் தந்தை, அதிர்ச்சியடைந்தார்.

"டேய் குமார், இனிமேல் நீ பம்பு செட்டுப் பக்கம் வர வேண்டாம்'' என்றார்.

"ஏம்ப்பா?''

"பம்பு செட் அறைக்குள் நல்ல பாம்பு ஒன்றைப் பார்த்தேன். அதை அடிக்க ஓடினேன், தப்பி ஓடி விட்டது. மறுபடியும் பம்பு செட்டுக்குள்தான் ஒளிந்திருக்கும். நீ அங்கு போகாதே'' என்றார்.


அவனும் பம்பு செட் அறைக்குள் செல்லாமல், தோட்டத்திலுள்ள மரத்தின் நிழலில் அமர்ந்து வீட்டுப் பாடங்களை எழுதிக் கொண்டிருந்தான்.அப்போதுதான் அந்த வெறிநாய் குமாரை கடிக்கப் பாய்ந்து வந்தது. நாய் சத்தத்தைக் கேட்ட குமார் பயந்துபோய் பம்பு செட் அறையை நோக்கி ஓடினான். அப்போது பம்பு செட் அறையிலிருந்து வெளியே வந்த நல்ல பாம்பு, நாயின் மீது சீறி விழுந்தது. நாயோ வெறியோடு பாம்பைக் கடிக்கப் போராடியது. பாம்போ கோபத்துடன் சீறியது. நாயும் வெறியோடு பாம்பைப் பார்த்து `லொள்... லொள்...' என குரைத்தது. பாம்போ மாறி மாறி நாயைக் கடித்து விட்டுத் தப்பி ஓடிக் கொண்டிருந்தது.

சத்தம் கேட்டு ஓடிவந்த குமாரின் தந்தை பாம்பைப் பார்த்து விட்டார். அருகில் கிடந்த கம்பை எடுத்து ஓங்கி பாம்பின் தலையில் அடித்தார். பாம்பு செத்து விட்டது. உடனே பாம்பைத் தூக்கிக் கொண்டு குமாரிடம் காட்டுவதற்காகக் கொண்டு வந்தார்.

குமாருக்கு பெரும் அதிர்ச்சி.

"அப்பா, நம்ம ஊரைப் பயமுறுத்தி வந்த வெறிநாய் என்னைக் கடிக்க துரத்தியது. பாம்பு தான் இடையில் வந்து என்னைக் காப்பாற்றியது. இல்லேன்னா, வெறிநாய் என்னைக் கடித்துக் குதறி இருக்கும். நாயும் செத்துப் போச்சு. பாவம் நல்ல பாம்பு... அதை ஏம்ப்பா சாகடிச்சீங்க?'' என்றான்.

"டேய் எப்படிப் பார்த்தாலும் ஆபத்துத் தாண்டா வரும். தெரியாம பாம்ப மிதிச்சாலும் சாக வேண்டியது தான்'' என்றார்.

"நெருப்பு கூட ஆபத்தானது தான். அதற்காக அதைப் பயன் படுத்தி சமைக்காமலோ, சாப்பிடாமலோ இருக்க முடியுமா? புலி வசிக்கிற காட்டுலதான் புள்ளிமான்களும் வசிக்குது. பூனை வசிக்கிற வீட்டுல் தான் எலிகளும் வசிக்குது. பாம்பு வசிக்கிற கிணத்துலதான் தவளைகளும் வசிக்குது.

`நல்லதும், கெட்டதும் சேர்ந்து வாழ்வதுதான் வாழ்க்கை. அந்த வாழ்க்கைல தன்னோட புத்தியை வச்சு பிழைக்குறதுதான் திறமை'ன்னு என் வகுப்பு டீச்சர் சொன்னாங்க. நாம தொந்தரவு செய்யாதவரை நம்மைச் சுற்றியுள்ளவற்றால் எந்த ஆபத்தும் வராது'' என்றான் குமார்.

குமாரின் தத்துவமான பேச்சைக் கேட்டு, அவனை உச்சி முகர்ந்து பாராட்டினார் முத்துவேல்.

தாழை மு.ஷேக்தாசன்

"நெருப்பு கூட ஆபத்தானது தான். அதற்காக அதைப் பயன் படுத்தி சமைக்காமலோ,
சாப்பிடாமலோ இருக்க முடியுமா? புலி வசிக்கிற காட்டுலதான் புள்ளிமான்களும்
வசிக்குது. பூனை வசிக்கிற வீட்டுல் தான் எலிகளும் வசிக்குது. பாம்பு
வசிக்கிற கிணத்துலதான் தவளைகளும் வசிக்குது.

`நல்லதும், கெட்டதும்
சேர்ந்து வாழ்வதுதான் வாழ்க்கை. அந்த வாழ்க்கைல தன்னோட புத்தியை வச்சு
பிழைக்குறதுதான் திறமை'ன்னு என் வகுப்பு டீச்சர் சொன்னாங்க. நாம தொந்தரவு
செய்யாதவரை நம்மைச் சுற்றியுள்ளவற்றால் எந்த ஆபத்தும் வராது'' என்றான்
குமார்.
நல்ல படிப்பினைதரும் கதை அருமை நன்றி அண்ணா