ஸ்ரீஸ்ரீ ரவிசங்கரிடம் ரூ.42 கோடி கேட்டு மிரட்டல்!

by ரபீக் Wed Jun 30, 2010 11:57 am

பெங்களூரில் உள்ள ஸ்ரீ ஸ்ரீ ரவிசங்கரின் வாழும் கலை ஆசிரமத்துக்கு ரூ. 42 கோடி கேட்டு மிரட்டல் தொலைபேசி வந்துள்ளது. இல்லாவிட்டால் ஆசிரமத்தின் பல ரகசியங்களை வெளியிடுவேன் என்று அதில் பேசிய நபர் மிரட்டியுள்ளார்.

கனகபுரா ரோட்டில் உள்ள இந்த ஆசிரமத்தில் கடந்த மாதம் துப்பாக்கிச் சூடு நடந்தது. ஆசிரமத்தில் ரவிசங்கர் பேசிவிட்டு காரில் ஏறிச் சென்ற பி்ன்னர் வானிலிருந்து வந்த குண்டு அங்கு நின்றிருந்த வினய் என்பரின் தொடையை உரசிச் சென்றது.

இது தனக்கு வைக்கப்பட்ட குறி என்று ரவிசங்கர் கூறினார். இதனால் பெரும் பரபரப்பு ஏற்பட்டது. மேலும் ரவிசங்கருக்கு போலீஸ் பாதுகாப்பும் தரப்பட்டது.

ஆனால், இது ஆசிரமத்தில் நடக்கும் கோஷ்டிப் பூசலால் நடந்த சம்பவமாக இருக்கலாம் என்று கூறி போலீசார் பிரச்சனையை மேலும் குழப்பினர்.

இந் நிலையில் ஆசிரமத்தை ஒட்டியுள்ள பண்ணை வீட்டைச் சேர்ந்தவர் நாய்களை விரட்ட வானை நோக்கி சுட்டபோது, குண்டு தவறுதலாக ஆசிரமத்துக்குள் பாய்ந்து விவரம் பி்ன்னர் தெரியவந்தது. இருந்தாலும் ரவிசங்கருக்கு பாதுகாப்பு தொடர்கிறது.

இந் நிலையில் இப்போது ஆசிரமத்தின் ரகசியங்களை வெளியிடுவேன் என்ற எச்சரிக்கையோடு ரூ. 42 கோடி கேட்டு ரவிசங்கருக்கு மிரட்டல் வர ஆரம்பித்துள்ளது.

நேற்று ஆசிரமத்தின் செயலாளர் கிஷோர் பிரசாத், துணை மேலாளர் ரவி கெளடா ஆகியோருக்கு வந்த தொலைபேசி அழைப்பில் பேசிய ஒரு நபர் ரூ. 42 கோடி கேட்டு மிரட்டினார்.

இரண்டு தொலைபேசிகளில் இருந்து பேசியுள்ள அவர் ஆங்கிலம் மற்றும் கன்னடத்தில் பேசியுள்ளார். பணம் தராவிட்டால் ஆசிரமத்தில் நடக்கும் சில விவகாரங்களை அம்பலப்படுத்துவேன், ரகசியங்களை வெளியிடுவேன் என்று மிரட்டியுள்ளார்.

கடந்த 2 மாதங்களாகவே இப்படி மிரட்டல் வருவதாகவும், ஆனால் இப்போது தான் ஆசிரமம் தலகட்டாபுரம் காவல் நிலையத்தில் புகார் செய்துள்ளதாகவும் தெரிகிறது.

புகாரை பதிவு செய்ய ஆசிரமம் ஏன் இவ்வளவு நாட்கள் எடுத்துக் கொண்டது என்று தெரியவில்லை.

மத்திய அரசிடம் நீண்ட காலமாகவே தனக்கு இசட் பிளஸ் பாதுகாப்பு கேட்டு வருகிறார் ரவிசங்கர் என்பதும் குறிப்பிடத்தக்கது.