3 கோல் போட்டு சிலியை வீழ்த்தியது பிரேசில்: கால் இறுதியில் நெதர்லாந்துடன் மோதல்

19-வது உலககோப்பை கால்பந்து போட்டி தென் ஆப்பிரிக்காவில் நடைபெற்று வருகிறது. நேற்று நள்ளிரவு நடந்த 2-வது சுற்று ஆட்டத்தில் தென் அமெரிக்க கண்டத் தில் உள்ள பிரேசில்- சிலி அணிகள் மோதின.

5 முறை சாம்பியனான பிரேசில் அணி தொடக்கத்தில் இருந்தே ஆதிக்கம் செலுத்தியது. அவர்களின் அபாரமான தாக்குதல் ஆட்டத்துக்கு ஈடுகொடுத்து விளையாட முடியாமல் சிலி அணி வீரர்கள் திணறினார்கள்.

ஆட்டத்தின் 35-வது நிமிடத்தில்தான் பிரேசில் அணியால் முதல் கோலை அடிக்க முடிந்தது. கார்னர் வாய்ப்பை பயன் படுத்திக்கொண்டு மய்கான் அடித்த பந்தை ஜுயென் தலையால் முட்டி கோல் அடித்தார். இந்த கோல் விழுந்த மேலும் 3-வது நிமிடத்தில் பிரேசில் இரண்டாவது கோலை போட்டது.

ககா தட்டிக்கொடுத்த பந்தை முன்கள வீரரான லூயிஸ் பேபினோ மிகவும் அருமையாக கோல் அடித்தார். இந்த உலக கோப்பையில் அவருக்கு 3-வது கோலாகும். முதல் பாதி ஆட்டத்தில் பிரேசில் 2-0 என்ற கோல் கணக்கில் முன்னணியில் இருந்தது.

2-வது பகுதி ஆட்டத்தின் தொடக்கத்தில் சிலி வீரர்கள் தாக்குதல் ஆட்டத்தில் ஈடுபட்டனர். பிரேசில் அணியின் பின்களம் மிகவும் வலுவாக இருந்ததால் அவர்களால் கோல் அடிக்கும் ஏரியாவுக்குள் முன்னேற முடியவில்லை.

59-வது நிமிடத்தில் பிரேசில் அணி 3-வது கோலை அடித்து சிலி அணிக்கு மேலும் அதிர்ச்சி கொடுத்தது. ரோபினோ இந்த கோலை அடித்தார். சிலி வீரர்கள் கடைசி வரை கோல் அடிக்க போராடினார்கள். பிரேசில் கோல் கீப்பர் சீசர் சில வாய்ப்புகளை தடுத்தார். இறுதி வரை அவர்களால் பதில் கோல் போட முடியவில்லை.

ஆட்டத்தின் முடிவில் பிரேசில் 3-0 என்ற கோல் கணக்கில் அபார வெற்றி பெற்று கால் இறுதிக்கு தகுதி பெற்றது.

சிலிக்கு எதிராக அந்த அணி பெற்ற 47-வது வெற்றியாகும். பிரேசில் அணியின் முன்னணி வீரரான ககா 30-வது நிமிடத்தில் மஞ்சள் அட்டை பெற்றார். ஐவேரிகோஸ்ட் அணிக்கு எதிரான ஆட்டத்தில் 2 மஞ்சள் அட்டை பெற்றதால் போர்ச்சுக்கல்லுக்கு எதிராக ஆட தடை விதிக்கப்பட்டது. இது தவிர ராமிரஸ் (பிரேசில்), விடால் பியூடென்ஸ், மில்லா (சிலி) ஆகியோரும் மஞ்சள் அட்டை பெற்றனர்.

பிரேசில் அணி கால் இறுதியில் ஐரோப்பா கண்டத்தில் உள்ள நெதர்லாந்துடன் மோதுகிறது. இந்த ஆட்டம் வருகிற 2-ந்தேதி (இந்திய நேரம் இரவு 7.30 மணி) நடக்கிறது.

முன்னதாக டர்பனில் நடந்த 2-வது சுற்று ஆட்டத்தில் நெதர்லாந்து 2-1 என்ற கோல் கணக்கில் சுலோவாக்கியாவை தோற்கடித்தது.