நட்பு நலம்

இயற்கை வளங்களை உடல் கருவிகளையும், அறிவின் ஆற்றலையும் கொண்டு வாழ்வின் வளங்களான உணவையும், உறைவிடத்தையும், வாழ்க்கைத் தேவைகளையும், நிறைவு செய்து கொள்ள ஏற்ற திறமை அமைந்த சிறந்த உயிரினம் தான் மனிதன். வாழ்க்கைத் தேவைகளை நிறைவு செய்து கொள்வதற்காக, பிறந்தது முதல் 15 வயது வரை யிலும், 60 வயதுக்கு மேல் முடிவு வரையிலும், மத்திய காலங்களில் கூட நோயுற்ற போதும், உறுப்புகள் செயலற்ற போதும், மனிதன் தன் திறமையை நம்பி வாழ முடியாது, பிறர் உதவி கொண்டே தான் வாழ வேண்டும்.

மேலும் மனித குலத்திற்குத் தேவையான பொருட்கள் எண்ணிறந்தன. அவற்றைச் சமுதாய மக்கள் அனைவருமே ஆங்காங்கே உற்பத்தி செய்து, பலரும் பல நாட்டவரும் பங்கிட்டுக் கொண்டுதான் வாழவேண்டும். இந்தத் தவிர்க்க முடியாத சூழ்நிலைகளால் சமுதாயத்திலுள்ள மக்கள் எல்லாருடைய நட்பையும் பாதுகாத்துக் கொள்ளும் பொறுப்பினை மனிதன் ஏற்றுக் கொள்ள வேண்டியவனாகிறான். எவருடனும் பகை, வெறுப்பு, பிணக்கு இவை எழாமல் அவன் பாதுகாத்துக் கொள்ளவும் வேண்டும். வரவு செலவுக் கணக்கில் லாபநட்டம் இருப்பு இவற்றைக் கணிப்பது போல, தனி மனிதன் வாழ்விலும் அவனுக்கு எத்தனைபேர் நண்பர்கள், எத்தனைபேர் விரோதிகள் என்பதைக் கணக்கெடுத்தால் மனிதவளம் எவ்வளவு அதிகம் என்று எளிதில் உணரலாம். எனவே மனிதனுக்கு நட்பு நலம் என்பது வாழ்வுக்கு மிகவும் உறுதுணை என்பதை எல்லோரும் அறிய வேண்டும். ஆகையால் உடல் நலம், மனவளம் மனிதவாழ்வுக்கு மிகவும் முக்கியம் என்பது போல நட்பு நலமும் மிகவும் அவசியமானதாகும். இதனை எந்த வழியிலும் காத்துக் கொள்ளும் பண் பினையும், திறமையினையும் ஒவ்வொருவரும் பெற வேண்டும். காக்கவும் வேண்டும்.

நட்பு கெடுவதற்குக் காரணம் :
தன்முனைப்பு, பேராசை, பிறர்வளம் பறித்தல், பிறர் தேவையும், உணர்வும் அறியாமல் அல்லது மதியாமல் சுயநல உணர்வோடு குறுகிய மன நிலையில் செயல்படுதல், நன்றியுணர்வு இன்மை இவைதான் ஒருவர் வாழும் சூழ்நிலை அல்லது சமுதாயத்தில் உள்ள மக்களோடு அல்லது உறவின ரோடு உள்ள நட்பு கெடுவதற்குக் காரணம்.